كارمنسيتـــــــــــــــــــــا

مش صوره مرميه على طرف باب بيت شعر

ولا غنوه منسيه / لحن افتكاره صعب

الشكل لحوريه / والفعل جنيه/ والاسم –بيقولوا- ف الاصل/ انسيه

ماكانتش كدابه /وده فعل تمنه الموت

لو يعنى صدقنا / اكذوبة انك حى

مش شرط احلامك/ تملك تحققها

وده منتهى ضعفك

الحلم كان مخلوق / لجلن يشوف النور

الحلم بات مخنوق ..

يوم ما ارتجيت ضعفك /يفتحلك المقفول

يوم ما ارتضيت كونك/ ف دنيتك مفعول

يوم ما اشتكيت خوفك/ و سمحت انه يقول ........

الزم هنـــــــــــــــاك ركنك

غجريه على طرف القلوب تتشاقى

و تدوب / و ما تتوبشى

و ما تشوفشى ف عينيها دموع

و بتقول( لأ ) بدل (الآه)

و تتلون بالف حياه / عشان تكسر سكون الموت

و بتفوت على جسر الالم .. بعناد ..

و ضحكايه

و دى حكايه ..

تجلجل / ف القلوب تشتاق

تزلزل كل ركن بخوف

بادراك اللى عدا الشوف ..

بتعلن خطوته الجايه / بكل يقين

ما فيش وشين / عشان تكذب و تتجمل

ما فيش غشين / عشان جواها تتحمل

فلا بتضحك على روحها

و لا بتوهب لـ ( غير ) / روحها

و لا بتوهب لغير روحها / براح الروح

ما تملكشى الا تهواها

ما تملكها الا.. بهواها