يا تفاصيل المعاني بلاش تبانيلي
انا اللى من بدء الحياه شواف
فلوغمضت عنيا عليكي هاوديني
و ما تحاوليش توريني الـ منه بخاف
-----------------------------------------
يا تفاصيل الغياب / غيبي
الشمع مش منقاد لتغريبي
الشمس مش لجل اللهيب تتهاب
و الليل برغم سواده له احباب
--------------------------------------
يا تفاصيل المعاني خلاص انا كفيت
و قولى ايه توريني ؟ دا انا مليت
في شوف رؤيه و رؤية شوف
اذا كل الدعاوي خلاص انا لبيت
---------------------------------------
دي اسرار الغياب قالت
بمكنون اللى عدا الكون
عشان يوصل لتفصيلة
غياب كان لازم انه يكون
-----------------------------
دى اسرار الغياب سابت
علامات للى حاسسها
على خطوط الكفوف قالت
و كنت احسب / هلاويسها
---------------------
يا اسرار الغياب لسه
ف تفاصيل اللقا حسه
فيه كام نظره وكام همسه
ف تفاسيرنا اكيد ناقصه
----------------------------------
يا تفانين الغياب مره
تهاودي رغبتي المُره
ف معاهدة سلام كداب
مع شياطينك الحُره
--------------------------
يا تفانين الغياب / لا عتاب
اذا ما غيبتى بالاحباب
اذا احباب /و طاوعوكي
اكيد م الاصل كانو اغراب
--------------------------------
يا تفانين الغياب / اصحاب / اكيد ع الباب
انا قلبى ما هوش كداب
و كان يرتجي وصالهم / وحين زارهم ..
ف احلامه / كفر بغياب / و عمره ما تاب
----------------------------------------------------
يا تفاصيل اللقا هتبوحي بالاسرار
الــ اتسرق .. كان قلب/ بالمشوار
بيسابق الخطوه /لجل اما يوصلها
من يوم ما حصلها / بيواصل الاخطار
------------------------------------
يا تفاصيل اللقا استني / دا ما بيديش
لا قادر انى اوصله و لا انى ما اجيش
انا اللى النبضه سبقاني / و آآآه ياني
على اللى يمد لى ف ايده / يلاقي مافيش
-----------------------------------------
يا تفاصيل اللقا الـ مختار
انا غـــــــــــــــدار
صحيح ولا
انا محتــــــــــار
-------------------------------------
يا تقاسيم الغنــا ع الصمت مش لايقين
على غفلة هوى اتجرأت ع الــ باقيين
من خوف .. للقلق لظروف / اذا موصوف ..
لاحساسى الدوا / حبة دندنه رايقين
هناك 8 تعليقات:
=====
تسلمي وتسلم رباعياتك يا سهر
كل رباعية لوحدها حدوتة
والكل مع بعضه نص تقيل بجد
رسالة من حقي اوجهها إلى كل البهوات اللي بيكتبوا
- زي ما بيقولوا -
شعر
اتعلموا ازاي تكتبوا رباعيات من غير ما تقعوا في فخ سيدنا صلاح جاهين
يا رب يفهموا
مرة تانية
تسلم ايديكي وحروفك وكلماتك يا سهر
ربنا يحميكي
رباعياتك جميله اوى يا سهر
ماشاء الله عليكى
دايما مبدعه
استمتعت جدا بكلماتك الجميله
ولو انى مش مستغربها من حد موهوب زيك
تحياتى
كل سنه وانتى طيبه
الله على الكلمات الجميله
والرباعيات الرائعه
تسلمي
رمضان كريم
محمد
دايما بتشجعني
ووجودك هنا اسعدني
اقصوصه
و انت بالف خير يا رب
ممكن
الابداع انت واحد من ناسه
كل سنه و انت بالف خير
ميرسي لمرور اسعدني
تويتي
منوره ف اول مره تيجي هنا
اجمل ناس اللى بحبهم جدا اهل فلسطين
كل سنه و انتِ طيبه
إرسال تعليق