التاريخ ما كدبش

التاريخ ما كدبش
لكن احنا كدبنا
اما قولنا هنشيله
فشلناه
ع الرفوف تذكار
فلا اتذكرنا
و لا الذكرى نفعتنا ..
يمكن عشان مش احنا المؤمنين ؟
و لا هما
و الميزان ما لوش غالى
فطبت الكفه اللى شايلاهم
و طبينا ف المحذور
--------------------

اتباهى اوى بطيبتك
وحدة قياس خيبـْتــِك
كام واطى ف الثانيه
بيدنسوا شيبتـِـك
و تاريخك العمران
ف سبعتلاف خطوه
بـَـنـِيتـُوه و بحجاره
بـْـنـْـتوه و نتدارى
ف حكايه ملتوته
يا جدودى بتأسف
لسيرتكم الفايته
على جيل ما شرفشى
اساطير بنحكيها
نتباهى ببطوله
ملناش اثر فيها
بربابه غنيها
و الرقصه ع الخطوه
شاطرين اوى فيها
على نغمة الاحزان
راح نبكى و نأثر
ف قلوب ما تتأثر
الا يا دوب ثانيه
ترجع لرحلتها
ف طاحونة اللقمه
و الهدمه ما تطولشى
تستر صحيح عارى
عارى بصحيح انى
يا جدودى انا منكم
فينى انا و فينكم
مسرور انا لما
مسرور يجيب راسك
يا شهرزاد ليلك
ما بينتهيش / لا بفجر
و لا ديك بيتدن لك
و انتى ما بطلتيش
مليت حواديتك
شاطر حسن واحد
خايبين كتير اكتر
حتى حواديتنا
ازمتنا طالتها
دخل الخيال ناقص
ميزانيته فاضيه
قصر الخيال غالى
بنصوره ف حاره
و اميرة الحواديت
مرفوعه م الخدمه
بناء على رغبة
جمهور ما بيحسش
بكلام ما بيهزش
و بناء على غيبة
فارس و اسطوره