عصى ع البوح

و اعذرنى
اذا فاض الكلام كيله
و تاهت منى معاذيره
و ما عرفتش
احطك بين كتير حرفى
و بتدور .. تلاقى مفيش
منيش درويش
هدق الدقه ف الحاضره
مشاعرى تكون اوام حاضره
و ينطق ( جن ) احساسى
منيش قاسى
انا المحتار
ما بين السر و التصريح
و انا الخايف من التباريح
و انا المعجون ..
بمية عـِندى / و بلائى
يكون انت
بلاقى كيانى اللى انفرط حسك
و لملم م اللى جاى للـ فات
و بيرمم وجع قلبك
و بتصدق ف احساسك
و بتكدب كمان فيا
و عندك حق / و النيه ..
ماليها حروف تأيدها
تبوح بيها ..
تقول هيه
منيش حاوى
ولا ناوى
لكن غاوى
و قلبك انفرط ف الروح
و كنت انت ..
( العصى ع البوح )

تشترى صك .. و تهوهو ؟؟؟؟

و خد لك صك
يا صاحب القفا ..
و عَـرَضْ لي احلامك

ف صحة دم اهلك ( سِك )

هتختار ايه ؟؟
ده سهم اهرامنا ف النازل
و عم ( الهول ) ..
ما هوش عاجب
و احوالك ..
عجب اكتر

تاخد ف النيل ؟
و تتنيل كمان اكتر
و لا يتبل يوم ريقك
و ايه يعنى
ما هو انت ..
ف كل حال ..
عطشان

الا اونا
الا دوى
يا داهيه تدقى و تدوى
تاريخ طازه ..
يادوبك زوروه الصبح
تاخد لك سهم ف الطازه ؟؟
ما يسواشى ؟؟
خلاص ماشى

خلاص حقك ..
عليا ياعمى
بيع حقك..
و كبر راس ..
و على دماغ
و ركك بس تحسبها
دا صكك يسوى ..
قرشين ساغ

روليت داير

روليت داير
و رغم الحظ
انا الزاهد
لكل قمار
و مش محتار
عشان ساكت
و مش بختار
لا قلة حيله كان صمتى
و لا كتر الكلام اصرار






هتكسرنى
ده مش ممكن
هتخسرنى
ده مش جايز ..
اكيد ممكن
و لو ممكن
ترد الباب على جرحى
متفتحشى
لطوفان موجوع

متسالشى
مين الـ بايع
و مين ضايع
و مين احساسه متفرفت
على اعتابك
ده ف عتابك
بتوجعنى

بتسمعنى
و انا ساكت
و قلبى من زمان ساجد
بيدعيلك


و كانت غلطته الاحساس



شروق شمسك معاندنى
و ضى القمره متخبى
و انا ف العتمه مش شايف
حدود قلبى
و تفاصيل السكك شارده
و نفسى ف البعاد فارده
الوجع و الاه
على الاخر

منيش فاكر
ف اخر مره ضمتنى
انا نسيتنى
ف حضنك
ولا سحرتنى
تباريح الندا ف صوتك

مولد و انفض

مولد احساس .. لم الدراويش

و الحاضر غاب

و الذكر .. مفيش

و الدوشه سكوت

و الروح بتفوت

و تسيب رعشه

على جسم ممدد ف الحضره

و اشخاص موجوده و مش حاضره

زفة مُريدين

و لا هم رايدين

و لا هم داريين

مولد و انفض

ميت........ حى

نسيم البحر

بيراودنى عن ذكرى

و انا ما ليها ... بستسلم

فـ بيحاول

كمان مره

و بيغالب

و انا الغالب

بعاند كل يوم ضعفى

صحيح ليه الذكرى يوم ما تموت ؟؟

و ليه صفحتها ما بتطويش؟

منيش مكسور

انا قادر اعدى السور

مفيش بدعه

مفيش اقوى من الـ كاين ..و مش موجود

نسيم البحر كان خدعه

و صوت البحر كان وهمى ....

دا طيف ذكرى

لميت حى

----------------

طقس غـُـنـا

يا راسم ع الورق صوتى

و سامع فكرى م الاول

و شايل م الالم و الاه

و متشكل بالف حياه

منيش مستغنى عن صوتك

فلا تفارق

ولا تاخد ملامحى معاك

انصبلى خيمة الدروشه
طقس الغنا اعلن حضور
و ف عز لحظة الانبهار بالشعوذه
يطرح ملل
صوت الغنا ما بقاش طرب
ما عادش باقى ( غير هرب )
تعظيم سكوت
لكل كلمه قايمه
رافضه ...
الانتحار

تحت وطئة الانكسار
مفيش حوار
حتى الحروف
مكسوره عينها م القلم
مش رافعه رمش ...
ف صفحه فاضيه م الشعور
و الصرخه طالعه و جارحه صمت الاختيار
من غير قرار
*******************

مسحراتى

مسحراتى

اخر الليالى

انا جاى اطبل

و اقول بعوده

تم تا تم تم تم

يجمعنا دايما

ايام جميله

و ييجى تانى

بايام ودوده

تم تا تم تم تم

يطرح علينا

ظلال محبه

و قلوب تنو

ربخير وجوده

تم تا تم تم تم

و عيد يهل

علينا نفرح

يا رب دايما

ايامنا بيضا

تم تا تم تم تم

و اخوه لينا

ف الامها تسرح

اطفال ف عيدهم

فساتينها سوده

تم تا تم تم تم

يا رب فرح

ايام وطننا

خلينا نحضر

ايام صعوده

تم تا تم تم تم

جمل قلوبنا

بالحب فينا

و من فينا يمرض

اوام نعوده

تم تا تم تم تم

يا رب سامح

لو يوم خطينا

انسان و جاهل

عدا حدوده

تم تا تم تم تم

و ارضى عن

ايا رب و اغفر

و جود علينا

وانعم بروضه

تم تا تم تم تم

رمضاااااااااااااااااااااااااان كريييييييييييييييييييييييم

وعد فراق

يا طاير للضيا عصفور
يا قلب النور
و تكوينه
و ضى جبينه
بيزينه
منيش مجبور
اصدق ان طيرانك
ده كان غيـَّه
ولا النيـَّه
ولا جايه
و جايبه ف جيبى قيد صوتك
ولا وعد انى اكون ليلى
و
بلقيس حلم قبانى
انا الجانى
لجرم العشق .. بستسلم
و ارمى كل احزانى
ف بحر و منه انا شارب
فاعود تانى
و افيض .. اشواق
و وعد فراق
فـ ما تخافشى
و املا الكون بطيرانك
لحد ما يملا صوتى غـُناك
و تحتاج للدفا و البيت
فعود تانى
هتلقانى

على هامش رحله

انا و صمتى الصاخب بموسيقى البنفسج و حروف كلما اعدت قرائتها تتمثل فى شىء جديد ، فما كانت ( أنت ) اصبح ( هو ) .. كل الفارق انى ادركت انه – اى هو – كان اقرب لك من أنت !!
**********************

انا و قهوتى الصباحيه ... و الكثير من نظرات الماره ... الكثير منها لا يخلو من الود الذى لا هدف منه سوى القاء تحية الصباح بوجه تعلوه
ابتسامه لتجعلك الابتسامه طائر بجناحين و لو لبعض ثوان .
و البعض من نظرات الفضول لتلك الغريبة الاطوار التى تبدأ يومها فى الصباح الباكر بفطور و كتاب ...
*****************************




الدخان المتصاعد من السيجاره المشتعله يعبرنى مسرعا ً غير مكترث – هو و لا الريح التى تساعده فى رحلة الهروب – برغبتى فى تلك اللوحات التشكيلية الابداع .. السيريالية التكوين التى لا يشوبها سوى لونها الرمادى..... كم وددت لو تتوقف قليلا لاضفى عليها بعض من لون ...
و اعلم كما ادرك انها ايضا ً تعلم – اقصد اللوحات – ان لو توقفت قليلا لتركتها على حالها ، لست من مفسدى الطبيعه .
************************





فى الوجوه حكايا ... لذا لست بارعة فى سرد الحكايات لقلة مقدرتى على التطلع فى وجوه الاخرين ... خجلاً
لكنى اختلس النظر فى هوامش الحكايا بين الحين و الاخر .

وجه التقيته مصادفة و لا ادرى ما الذى القى به فى اقرب مقعد ليبدأ تبادل بعض العبارات العابره ...
اليوم اجتهد لادرك بمن يذكرنى .. ربما يذكرنى بنفسه
يقترب ثانية مصادفة ايضاً فأشيح بوجهى عنه و أتشاغل باوراقى ...لا ارغب اليوم فى اجهاد النفس بابتسامة مجامله او حوار يتسلق شاهق النفس .. من خارج الروح ... باب القلب مغلق ... للاجهاد .
********

لا شىء اجمل و لا اصفى من ابتسامة طفله لك على غير سابق معرفة - الاطفال لا يحتاجون الى بطاقة تعريف و انما ينفذون الى بطاقة الروح بمقدره سحريه – لتعبرك و تظل ابتسامتك محفوره على وجهك و قلبك لبعض دقائق تتمنى ان تدوم ..
دون ان ينعتك الماره بالجنون لانك تبتسم للا شىء ...( الطفله غادرتنى منذ فتره )
*********************

الابتسامه .. تلك البوابه السحريه ليوم جديد .. جديد فى كل شىء .. انسجام مع كل الاشياء و الاشخاص .. ليس جميعهم ( عفواً .. لا مساحه للكذب هنا على صفحة بيضاء ) .. لا زال البعض منهم تفصلنى عنهم مسافات تضن بقليل من الانسجام بفعل تجهم الروح ... و على ذكرهم تلاشت الابتسامه .. سأحاول ثانية عبور ممر سرى افتح به البوابه .
*****************

فى مشاوير الحياه

فى مشاوير الحياه دايما

بنتلاقى

برغم زحام

وشوش و حطام ....

بواقى الناس

بنعرفهم

من الاحساس

يبص القلب ويشاور

و يوصف فى
ملامحهم

بنعرفهم

و نوصفهم

و ... بنسيبهم

و بنكمل

و من غيرهم

فى مشاوير الحياه دايما
----------------------------
فى مشاوير الحياه
بزعل....
ساعات بزعل
عشان قلبى
نسى درسه
و قطع صفحه ف الكراس
و قال
من اول الاحساس
لو ان الدرس اهو حافر
تجاعيده
قلبى بينسى و يعيده
----------------------
فى مشاوير الحياه صدفه

تجمعنا بناس اصفى

تكون الدنيا ف وجودهم صحيح ادفى

و ناس ما خفى كان ادهى

كما الندهه..
لنداهه

و حلو كلامها.... و لا اشهى

و لا ابهى ..

و لا احلى ...

و اخرتها تكون وحله

من لا يحب الان فى هذا الصباح ... فلن يحب

من لا يحب الان فى هذا الصباح فلن يحب ...... محمود درويش

************************************

فافتح مسام قلبك لهذا النسيم الذى اتاك عنوة

فى غفلة ... و عن يقين.. و ارتقب قدوم الحنين المسلوب منك ...


ذات مساء لم يأتى بعد


إبدأ فى تزيين النجمات بجوار القمر السهران ... ليكون بك مؤتنس


يسئلونك عن دورة الفصول ....


و انت الغير مهتم بتتابعها ....


ولا اختلافات الطقس .....


فطقس قلبك الان ربيع
__________________

نجم ... قد ملك المدار

يا سيدى

حط الرحيل بشاطئك

بعدما تعب السفر

انت ما كتب القدر

و قد ارتسمت على الجبين منذ دهر

تجتاح رؤياك السهر

و تمردت

و راودت

عينايا عن صحو جميل

أنـَّى البديل

و فى رحيلى ..اليك .. الاشتياق

و فى رحيلى عنك نار تستعر

يا سيدى

يا نجم قد ملك المدار...

بالطوع ...

وزمام القمر

يهديه ان شاء الضياء

او يهبه طوعاً للخفاء

فيحتجب

عن عيون

قد تشاء

ما يشاء

تبعثرنا

تـُبـَعْـثـِرُنـَا يـَدُ الأقدارِ

و بـَعْـدَ العُـسْـرِ تَـجْـمَـعُـنَـا

تُـدَلِـلُـنَـا

و تَـمْـنَـحُـنَـا

صُكُـوكَ العُـمْـر

ذاكَ الـمَـنْـثُـور فوقَ الدربِ بالـمـعـنـى

فـ يـَجْـمَـعُـنَـا

غَـدَاةَ الصَحْـوِ

بَـعْـدَ الـمَـوْتِ

لَـمْـلَـمْـنَـا

شَـتَـاتَ الأمْـرِ

هَـذَا الدَمْـعُ يُـخْـبِـرُنـَا

بِـأنَ دُرُوبَ بَـعْـثَـرَتِـى

لـهَـا مَـعْـنَـى

سر ... واجب

تقدروا تسموها تدبيسه
بس من نوع خاص جدا
حاجه شبه لعبه كنا زمان بنلعبها
كنا بنعمل ( note book ) ونكتب اسئله و نديها للشخص اللى هيجاوب الاسئله و كانت من النوع الصعب و الملىء بالاسرارو عشان كده كنا بندى صاحبها فرصه كام يوم يجاوب الاسئله و يرجعها

د . احمد صاحب مدونة وجه جديد
( و هو احد المدونيين الرائعين المتميزين بكتاباتهم الهادفه الصادقه )
تفضل مشكورا بتمرير كراسة الواجب لى
و من شروط الواجب زى ما هتشوفوا انى ( ادبس ) مجموعه كمان معايا
نبدا؟
استعنا ع الشقا بالله

س : أذكر 6 أسرار قد لا يكتشفها من يقابلك أول مرة
..قوانين الواجب:
1. أذكر اسم من طلب منك حل هذا الواجب
2. أذكر القوانين المتعلقة بهذا الواجب
3. تحدث عن ستة أسرار قد لا يكتشفها من يقابلك للمرة الأولى.
.4. حول هذا الواجب إلى ستة مدونين، وأذكر أسماءهم مع روابط مدوناتهم في موضوعك.
5. اترك تعليق في مدونة من حولت الواجب عليهم، ليعلموا عن هذا الواجب.

-----------------------------------


مع ان ماحدش ف الحقيقه بيفتح خزانة اسراره الحقيقيه
و بيقولوا ان اللى بيعمل كده زى اللى فاتح باب روحه على الشارع
و بيتهم احيانا بقلة الخبره و ......
لكن رغم سنوات العمر و رغم كل الكلام ده بشوف
( ارسم حدود شخصيتك على اد ما انت عارفها و عرف اللى يهمك امرهم عليها لتجنب الصدامات الناتجه عن جهلهم بالامور ... على اد متقدر )
ده كان سرى الاول
انى ما بعتبرش التعبير عن النفس و كشف جوانب الشخصيه - من باب تسهيل التعامل - ... سر

سرى التانى
عندى رهبة ( stage ) يعنى بخاف من مواجهة الجمهور
و ده مش ممكن التعرف عليه لا ف المقابله الاولى و لا الخمسين
بكون متماسكه اوى و بتكلم لكن جوايا برتجف و ربنا ما يوريكم
وده سبب هروبى من حفلات الموسيقى بعد حفلتى الاولى و الاخيره
( كلام قديم اوى يمكن ف الاعدادى )

سرى التالت
ومش عاوزه حد يضحك و يقول انه هبل
بنسى الاسيه
اه و الله بنساها مش بتناساها
يعنى بعد ما يمر وقت قليل على موقف عمله فيا حد - حتى لو كان اساء لى جدا – بلاقى نفسى نسيت الموقف .. و كمان بحس بعطف على الشخص اللى اساء لى جدا و بدور على طريقه افتح له بيها الباب عشان يحس انه مش مستحيل اننا نتصالح ونتجاوز النقطه
( مش نبهتكم م الاول ؟؟؟ كمان ما تستغلوش السر ده استغلال سىء)

سر رابع كمان
يا رب هون
مش عارفه عماله ادور على اسرار و مش لاقيه
اه افتكرت
ف المقابله الاولى ما حدش هيعرف انى عصبيه
و بثور بسرعه ( زى ما بتسامح بسرعه )
ما هى المقابلات الاولى ما بيكونش فيها حاجه بتعصب

سر خامس
كوكتيل متناقضات
انا نفسى لسه مش عارفه اتعرف على الكوكتيل كويس
و لا عارفه ازاى

سر سادس
من زمان بطلت اسند على كتف حد او اشتكى
بس .. ما بحبش الناس اللى بتعمل ده
و بكون سعيده جدا اما بحس انى سند لحد
حتى و لو فضفضه

السته الذين تم تدبيسهم ف الواجب

تخاطيف سيزيف
http://takhateef.blogspot.com/

محمد امين المصرى – شئون داخليه

http://internal-affairsss.blogspot.com/

موناليزا – امة الله
http://monaliza110.blogspot.com/

منار – حبر ابيض

http://www.mzgraphics.com/white-ink/

شادى اصلان

http://shadyyaslan.blogspot.com/

د. اسماء على
http://drasmaa.blogspot.com/

احمد عبد اللطيف _ هلاوس

http://ahmedlatif.blogspot.com/

بوح 3

الدمعه

حبة ندى بطعم الملح

سقطت على ارض فزادتها عطشا

سكنت فى اوصال الحزن المستباح

و الليل لاح

فتوارت قليلا

ثم كانت نجمة

تضوى فى سماء

عادت لتسكن الاعالى

فباركها

لا

لم تسقط هباء

بالعند ف المى

بالعند ف المى
و حزن الدنيا

الكامن فيها
و طالع فيا

و رغم الوجع المتكوم

ف طروف اليوم
ارجع تانى

و الون يومى باحلامى
و الذكرى ..و اشوط
الهم الـ مصاحب الخطوه
و اقول للدنيا

كفايه
ستوب لافعالك
لو صبر القلب دا بحر ما يفضى
هيفضالك
كفيت من فيضان افضالك

بوح 2

دقات الساعة تشير نحو غيابك غير المتعمد

هذا ما اعيد على مسامع قلبى

اسكب بعض من ذكراك فوق جمر انتظار

بعض اللهيب يغفو تحت سطح مجهول

يسترك الغياب باسداله

تمتد يداى لترفع البعض

لا استطيع

انسج بعض من الاطياف تحجبنى

تستدرجنى المتاهه

المسافات اليك و عنك تتساوى

اغيب ..

تغيب ...

لا ادرى

بوح 1

مساحتنا المثلى هى ورقة بيضاء و قلم .... و بعض الافكار السابحه فى سماء الاحساس

سماء و ليل و سفر طويل ..... ارتحال بلا طريق ... و السفر بلا رفيق ما اصعبه ..

فلنرافق البوح

البوح بوابتنا المثلى على منافذ النفس

مساحة بوح ليست لى فقط فهى لكل منا فلتتفضلوا بالقدوم

________________________________

كتاب الحلم مخطوط باحرف بيضاء و سوداء

فلا مجال للالوان ها هنا

تنبئنى ذاكرة الالم لا حدسى بانه لا وجود للالوان

و انها مجرد خطوه انتقاليه من الابيض للاسود و من الاسود للابيض

و ان قل حدوث العكس يتهامسون ... لقد جنت ... اصبحت منطقة محظورة غير واضحة البيان

رغم ان الابيض و الاسود ضدان واضحان

دوما حيرتنى الزهره و الشوك القابع فى اوصالها هل هو يدميها ايضا؟

تسائلت فقيل : هى دنيا لا جنه

قيل فلنهرب للحلم

قلت فلنهرب من الحلم

و لكن الى اين ؟؟؟؟

تسمح لى؟؟

تسمح لى

اضرب عرض الحائط

بالعرف السايد

و المفروض

و افرض كلماتى على المفرود

من برد الصمت اللى ف صوتك

و اقولك

ان الموجود لك ف ضلوعى

مش شىء بارد

و ما يتردش ...دا عليه ببرود

فى هذا المساء

فى هذا المساء
اودعها

نسمات كانت تعبر من هنا
نقرت على نافذتى الموصده
فازاحت سدائلها و ارخيت لها المزلاج
اجتاحتنى كريح طائش
غادرت من جديد
و لكنها تركت
اشيائى مبعثره
الملمها
اصادف بين الحين و الاخر
ورقه من ورقاتك
تنتابنى دمعات
اواريها
حتى عن نفسى
بعض كبريائى يمنعنى

يكون .... رباعيات

و كنت مصاحب الموجه لكن عمرى ما اسايرها

تهادننى /اهادنها .. تغالبنى / اكون واقف و اغالبها

و حاولت يا ما تكسرنى .. تغيرنى

لكن ولا يوم حنت ضهرى / و لا خلتنى احايلها

------------------

و كنت مصاحب الموجه و انا الملاح

و افكارى كما امواجى هياج و صياح

فصارعتنى و انا المغلوب

و لو غالب .. ما اكون مرتاح

يكون وقت الفرح اوهام

غريب من عالم الاحلام

يزورك طيفه و يسيبك

سهر ما عرفش لحظه ينام

------------------------

و كنت مصاحب الموجه و وعدانى

ترسينى .. تعدينى على احزانى

فرفعتنى لعاليها .. و همستلى بمعانيها

و فجاه سكنت واطيها ..و كتبتنى .. غريق تانى

يكون وقت الفرح ساعه

و وقت الحزن مية ساعه

فنكتب بالدموع يومنا

و فوق الفرحه ( متباعه )
__________________

و كنت الراوى و ربابتى تقول حواديت

نجمع م البلاد حواديتنا بالفتافيت

و لا كان ييجى على بالنا

نسمع ف البلاد راوى بيحكي عننا و يزيد

يكـون الحـلـم بيسـلم

وفاضـل لـحظه يتكـلم

ينادى بشوقه و بوصله

لقلـب بفرحــته يعـلم

-----------------------------

يكون الحرف جنب الحرف حدوته

يقول معنى و يرسم صوره مظبوطه

و مره يكون حروف مخنوقه م الرصه

ولا حسه و من رصتها منقوطه

تكون عالى الجبين صامد

تكون للدمعه دى معاند

فلا تقدر على كسرك

ولا يهدك طوفان جامد

---------------

و كنت مصاحب الموجه و تعجبنى الاعيبها

فما اتغرش بافضالها و لا بزعلش من عيبها

ف مره الموجه رفعتنى / لمحت الشط حبيته

عيون احلامى ناديته / اوام الموجه هديتها

يكون البعد سيف و النصل ده ف قلبى

يخوفنـى على الطفل اللى كان يـحبى


و يملا قلوبنا بالفرحه


و فجأه يشيخ و يتحول لريح طاح بـى

-------------------------------

تكونى مرايتى بتوشى

ملامح وش غير وشى

ادقق ف الرتوش .. فابوش

ملامح قلبى بتغشى

كل ايات الشكر للرائعين خلقا و فنا و عطاءا .... سماح ..... هانى رمضان .... اسماء... لتصميماتهم الجميله التى زانت قلبى قبل جدران مدونتى

من الحلم للجنه .. كوبرى الوهم

بين الحلم و بين الجنه .. سكة كوبرى الوهم يعدى
دبة خطو ركوبته تشوفه .. فتعلن خوفه
و هو يغمض عينه و عقله .. و يتبع خطوة مجنون قلبه .. يستفتيه لو مين افتوه
و رغم الجدل الطايح ..رايح .. يقفل على شبابيكها دماغه
لبى نداها ... النداهه .. و سرحت بيه


---------------
ضى النجم ف ليل يتنفس
نسمة صيف
خطوة ضيه تغالب خجله
و شوقه لوش البحر يجيبه
يفتح قلبه .. يسلم ليه
يرمى بكل العشق عليه
يلقى ف وش البحر مرايته
تمر سحابه ما بينهم يلعن
كل مسافه ليه تلغيه
تحجب وش البحر و صورته
تلغى ملامحه من اراضيه
حلم النجم الحلم الممكن
لو مش ممكن
مش ممكن يحلم بعديه
انه يقرب خطوته يمكن
يفرح اكتر لو يلاقيه
صورته ف وش البحر هتوضح
يبقى ف حضن البحر و ليه
عدا سنين الضى الغامق
ساب العرش و عارف انه
مش راجع يضوى ف لياليه
قرب اكتر
شاف البحر بيكبر اكتر
و ملامحه بتتفرق
لكن
صورته ف وش البحر اهيه
قرب اكتر
غرق النجم ف قلب مرايته
و وش البحر ما حسش بيه

اخر خبر

اخر خبر
م المفترض
ده يبقى طازه
و للاسف
خبرك قديم
و الوقت ماشى يكر كر
و ده لما جيت
انا اجر من طراطيفه
لحظه ..لحظتين
قالى انسرقت
كل اللى باقى
كان و راح
بطلت اشرب كاس جراح
لكن شربته بامر قهر
دافع ضريبة الانهيار
حبة مرار
حتى تراتيل الالم
ف ليل كسير
مفروض عليك تتليها صمت
و الدمع تبكيه فجاه ليه
و الدمع يبكيك عمر.. دهر
صحيت مظاهر الافتقاد
ف القلب ليه
و انت اللى مفقود من كتير
و انت اللى جريت الوجع ف القلب نهر
وضيت قلوب اتعفرت
صليتها فجر

فلسفه .. اسرح .فكـَّــر ... كبـــَّر ...2 ...مع سمر

عمرك حسيت بان الكون مره بيضيق عليك

و قبل ما يقفل مسامك مديت ايديك

و فتحت باب صغير على ممر ابيض منور ملوش حدود و لا فيه حد

و سرحت و ابتسمت

و اخدت نفسك بارتياح

و عدلت مشيتك و صفرت و انت ماشى و دندنت

و شوطت الهوا برجلك و قولت للهم تظظظظظظظ

و رفعت راسك للسما الزرقا و لبيت ندا الفراغ بالصمــــــــــت و القول الغير متـــــاح

مش صحيح الصمت فن ؟؟ ..

و رياضة روح .. ( قد تكون اجباريه) ..

لكنها مفيده .. زى اليوجا ..

تأمل و احتمال

و .... برد او نار

ده ف حالة الصمت المغلف بالـ ( تظ )

اما ف حالة الصمت المصحوب بالـ ( الزكام )

ده بيبقى صمت مرضى ..

بس مش مُعدى بالمره

يعنى مش شرط و انت مريض بالصمت أو بتتعالج بالصمت

تعدى اللى ادامك و تمنعه من الكلام و اكل النافوخ

و يفضل يا وولداه يجيبك يمين .. شمال مش نافع

يستفزك عشان تنطق

و انت فيه جواك شىء قافل كل مسامك

قالت صديقتى (ان الصمت ترف )

فقلت
و ساعات بيكون قرف

و استخسار الكلام ف شىء مش هيفيد

( اكل دماغ ع الفاضى .. و المكتوب مكتوب)

.. و اللى بيروح جاى و اللى جاى بيروح

تصدقى انتى

اصل لسه ما نفذوش اختراع الشوارع الـ (one way ) عشان اللى يروح ما يرجعش...

مع انه اختراع كويس

من باب التغيير .. او التهييس الله اعلم

فقامت صديقتى باختراع جمله
( استفيدى برغى الاخرين فى حالة صمتك )

و رغم جودة ظاهر الاختراع و الله اعلم بباطنه

هقولك انى مش بقدر استفيد بالاختراع ده

مش قولتلك بتبقى ( فى الميه )

سامعه و شايفه بس ف الغالب مش حسه ..

حاجه قافله على كل مسامك

و الدنيا تلاهى

امير صعلوك

امير صعلوك
لا واخد م البلاط حاشيه
ولا كان للملوك مملوك
يصاحب م الخدم حافيه
و م الاميرات
ما هوش مسبوق
لا هو السارق و لا المسروق
برغم انه ..
سرق م الوقت اوقاته ..
حس العمر كان مسروق
حزين ؟
يمكن
و صوت الضحكه بيجلجل
ضعيف ؟
جايز
و مش جايز يبان ضعفه
قوى؟
جداً
لكن
غلبان
كمان جداً
عنيد؟
طبعاً
و يلوى دراعه مع نفسه
و بيعاند دموع قلبه
بطبعه للعناد غاوى
هوايته
شغلة الحاوى
شاطر و جرابه ما يخلا
و لو يخلا بنفسه
ف لحظه
يحسبها
يحاسبها
و ما يسلم
و بيعلم
ف سكة كل من صادف
تقابله ف دنيتك مَـره
يحلى الدنيا
او يقلبها لك مُـره

عودة أنصاف

فى غيمه من اسدال الماضى ......

تشب الذكرى

توقظ بعض الضوء الغافل

على عتبات
تتسلل منها عتمة روح

تبوح

بأن الكائن هنا ...

بواقى ... انصاف

و ان النصف الاخر ..........

راحل

حيث فُـقِـدَ الكل هناك

و عدت ......

اجرجر بعضاً من انصاف

و اطلق عنه انه بعض منى عبثاً

انى ................

انى...........؟؟؟؟؟

تذكرت .....

انى لم اعد قط
----------------

حرف .. حلم .. تراب

تعبتنا

و ف طرف حرفك ....

خدتنا

و وجعتنا

لما قلبت الصور

و فردتها لنا ف وشنا

و احنا اللى

دوامات هروبنا من الصور

ولا مره كنا .. ما شفناهاش

مش راح اقولك .. لا بلاش

حرفك مشبك ف الالم

لكن القلم

لساه بيرسم ضى جاى

و لو ما جاش

-------------
تراب الحرف ..

يا معفر سطور منى

انا سبت الوجع مرصوص ..

هنا ف جوفى

يجوز ..

يمكن ..

ده من خوفى

و انت ( بدب ) طلعته

و طوعته ..

فقال المى

و كان قلمى ....

لبوح عاصى

تراب الحلم يا مغطينى

من ساسى كده لراسى

و مغيم لى شوف عينى

يا نور عينى

يا نور كداب

و رغم الكدب صدقتك

و كان شين الزمن بختك

و صوت سخطك

ما هوش مسموع

فكل ما تيجى توجعنى

اقولك غيـَّر الموضوع

فلا تغيـَّرو لا اتغيـَّر

فلسفه .. فكـَّــــر ... كبــَّــر

فلسفة الشاى البارد

-----------

دايما بنسى ف الماج شوية شاى ..

فما اشربشى و اقول بارد

عشان ما اشربش لكيعانى و لا الكوبايه تكون فاضيه

-------------------------

الفن التشكيلى .. عفوا التشكيكى

------------------

ده رايى ف القضيه... لانه بيشككنا ف نفسنا

من جوه جوه الشخبطه يقراها واحد انها احساس و خوف

و واحد يقول ان كان فيه بحر لكنه جف

تبتدى تحس ان مخك انت خف

و تشك حتى ف رؤيتك ...

او تعدى فوق كل ده و تبتدى تشوف انت حاجه تانيه خالص خارجه من بين شخبطه

بخرف ؟ يمكن جايز .. و غيرك هيقول عبقريه و فلسفه

و انا هتعدل ف قعدتى و احط رجل ع التانيه و ارسم على وشى انى مصدقه ..

لكنى من جوايا هقولك عندك حق لكنى بحب تخاريفى و تشكيكى حتى فى نفسى ..........

و العفو لكل الفنانيين

----------------------------

عربده

----

من حق كل انسان انه يوم يكون نفسه حتى لو كان عربده

و العفو لكل الملتزمين و متصيدى الاخطاء

ممكن تكون اخر حدود العربده شوية شعر.... شوية نوم ... شوية شاى ف البلكونه او اى شويه يخلوك تكون انت

فكون انت و لو يوم

يا رب

و لما الحزن يخطفنى
و دايما هو خاطفنى
اردد من دعاء يونس
و اتونس
بكلماته
و اتامل
( انى كنت من الظالمين )
يوسوس ليا مش ظالم
و اللوامه تفضحنى
انا الظالم
و انا العالم .. باسرارى
و اردد ف المدى...
و الكون يرددها صدا للصوت ...
يا رب ... و طالعه من قلبى
تسامحنى
تصالحنى على نفسى
على الدنيا
و انا الطماع
و مش عاوز اكون محروم من الآخر
ف م الآخر
انا المفتون
و بستغفر
و عارف
رحمتك اوسع

تراتيل ...ف الحلم

على عتبة امبارح جارح ..
فتافيت بكره
يتلملموا و يشبكوا ف ايدين
يصبحوا فكره
و حيطان الحلم
عليها ساندين
لكن بتضييق
كما ضيق العين
يطبق رمشين
ينعدم الشوف
و نموت م الخوف
على باب الحلم
نروح راميين
ارواحنا
و نقرا ف هواجسنا
تراتيل الشوق
للفرحه ف قلب الحلم
فـ نصحى
قبل ما نوصل
بدقيقتين

تسمع حواديت؟؟؟

مقدمه

-------

و جوه الصفحه

تحت السطر

ما بين تناتيش دموع الحرف

نتلاقى

وش ف وش

تحت الجلد مش مهرب

و لا تقليعة ارمى وراك

لان وراك

مسيره ف يوم

ينط ف لحظه ادامك

و يسأل

لسه فاكرنى

تقول طبعا

لكن بهرب

-------------------------------------

تسمع حواديت ؟

عمرك حسيت انك بلا بيت

مزروع ف مكان من غير جدران

مرسوم ف حيطان من هوا شخابيط

طاير ف سباق الضنا رهوان

اشجعها حصان

ف اجدعها ميدان

هداك طواحين الهوا

مليت؟

بردان ؟

بردان بالامك ...... و اتغطيت

و كانت لك ستر و اجدع حيط

حبيت؟

وقعت شخابيطك من ع الحيط

و بقيت عريان

اتواب الهوا اشكال و الوان

فيها الشفاف

فيها الدبلان

فيها اللى ما تعرف توصف خيط

و يكر القلب كتاب حواديت

يتبدر النبض الجوانى

فرافيت فرافيت

وقتها حسيت

بدبيب الطفل ف حشا دفيان

و حاوطت عليه برموش ..

و غفيت

طب لما صحيت

عارف ايه لقيت؟!!!!!!!!!!!

تسمع حواديت ؟؟؟