تراتيل ...ف الحلم

على عتبة امبارح جارح ..
فتافيت بكره
يتلملموا و يشبكوا ف ايدين
يصبحوا فكره
و حيطان الحلم
عليها ساندين
لكن بتضييق
كما ضيق العين
يطبق رمشين
ينعدم الشوف
و نموت م الخوف
على باب الحلم
نروح راميين
ارواحنا
و نقرا ف هواجسنا
تراتيل الشوق
للفرحه ف قلب الحلم
فـ نصحى
قبل ما نوصل
بدقيقتين

تسمع حواديت؟؟؟

مقدمه

-------

و جوه الصفحه

تحت السطر

ما بين تناتيش دموع الحرف

نتلاقى

وش ف وش

تحت الجلد مش مهرب

و لا تقليعة ارمى وراك

لان وراك

مسيره ف يوم

ينط ف لحظه ادامك

و يسأل

لسه فاكرنى

تقول طبعا

لكن بهرب

-------------------------------------

تسمع حواديت ؟

عمرك حسيت انك بلا بيت

مزروع ف مكان من غير جدران

مرسوم ف حيطان من هوا شخابيط

طاير ف سباق الضنا رهوان

اشجعها حصان

ف اجدعها ميدان

هداك طواحين الهوا

مليت؟

بردان ؟

بردان بالامك ...... و اتغطيت

و كانت لك ستر و اجدع حيط

حبيت؟

وقعت شخابيطك من ع الحيط

و بقيت عريان

اتواب الهوا اشكال و الوان

فيها الشفاف

فيها الدبلان

فيها اللى ما تعرف توصف خيط

و يكر القلب كتاب حواديت

يتبدر النبض الجوانى

فرافيت فرافيت

وقتها حسيت

بدبيب الطفل ف حشا دفيان

و حاوطت عليه برموش ..

و غفيت

طب لما صحيت

عارف ايه لقيت؟!!!!!!!!!!!

تسمع حواديت ؟؟؟

باليرينا

و لو بكره ف يوم مش جاى

مش لازم

هعيش يومى

و ارسم حلمى باللون اللى فاض منى

من امبارح

و لو جارح

هعديها

ما ياما مشينا انا و قلبى

و فوق الجرح عدينا

( باليرينا)

على طراطيفى انا بمشى

و عمر ما حط ...

كعب القلب على دربى

العبث المتقن

بعيدا عن العبث المتقن

ياتى هذا العفوى أَفْـتـَنْ.....

أُفـْتـَنْ

حين اعاود قراءة نفسى على صفحات

تتخللنى وقفةٌ و مسافات

فتعيد صياغة فاصلتى

حين تلاقط انفاسى

من فوق سطور

اثور

ابذل محاولة قصوى

ان اخفى بعض من ذات بين الكلمات

كى لا تتكشف

حين تلاقى بضوء الشمس

هذا المفتون بانبائى

و قبل الفجر بساعات

ارخى اسدالى

و حين يجن الليل ...

اعود

ارفع عنها نقاب حدود

و اعايش لحظات كيانى

كلام ف الحب

اكيد الحب شىء اكبر

من ان نقوله ف اغانى

او ان نصيغه ف معانى

او نحكى حتى يوم عنه

و نعرف نوصف التفاصيل

ملامح حب زى النيل

عميق جدا

طويل جدا

و واخد ف الغموض درجة

غامض جدا

لكن غموضه مش عنداً

و واضح

زى ضوء الشمس ما تصبح على جبينك

و خافت

زى همس القمره ما تمسى على ليلك

يكون ف العتمه قنديلك

يكون للدمعه منديلك

و لا ف الدنيا زى الحب حيجيلك

-------------------------------------

و نتكلم

كلام ف الحب مش اكتر

لكن الحب شىء اكبر

لا هو حكايه و روايه

و لا دمعه و ضحكايه

ده هو الاصل و الغايه

تكون انسان

و جوه جوه احساسك

تكون ونسان

و لو وحدك

و لوكل البشر جاحدك

كدبة عراف

و طاوعينى
اذا حلمك
فرد كفه
و قال ...
فسر
خط القلب متكسر
فوقعت ..
دمعتين من قلبى ...
على تفسيره
فاتأثر
باحساسى
و شديت ضلع كان محنى
و رممته
و لونته
و فسرته
على وهمى
فـ سامحينى
عشان كدابه تفاسيرى
و عشمتك
لكن قلبك ..
برغم الوهم ...
فسرنى

و ... غنينى

و قول انت
و غنينى
و وطى الصوت
ساعة ما تقول تراتيلى
ف ليل عاشق
عشان صوتك
وجع راشق
و لما يزيد ف حرفينك
هالات نورى
قوام إلحق
و طفينى
و بعترلى
حكاياتى
ما بين شطين
ف حضن يومين..
اشوف نفسى
و غربه سنين ..
و ما ترسى
اكون منسى
لكن فاكرينى حرفينك
و حار.. فينى

مشهد ناقص ......

لساه المشهد ناقص
راقص
بيخطى ف خفه لخط النار
كل دقيقتين
قناديل الشمع المطفيه
ساكنه الصفين
و جداول دمع عيون ناشفيين
و تبعتر على الطراطيف
تناتيف
لكرامة شعب حزين و ضعيف
كل مغامراته آخرها ...
رغيف
و اضيف؟؟
ولا الصفحه اتردمت بسواد؟؟
و سعاد !!
بتنادى ف سكان الفتارين
اصنام و ف هيئة بنى ادمين
رافعين للسلم ف كدب شعار
و انهار
انا و انت مع السامعين
على صفحه .. نكون ..
سطرين فاضيين
ف حروف مكتوبه بلون شفاف
عمره ما ينشاف

( سعاد .. خبرى من عن هوانا سائل ٌ ان هذا القلب محتاج لنبض ِ

انا إن غادرت دنيا حبنا .. فالهوى عهد سيبقى دون نقض ِ )

متشعبط ف طروف الحلم

متشعبط ف طروف الحلم

طالع جرى وراه طيران

جايز ارجع بالانسان

وف رحلة حزنى الدوامه

اهرب من نفسى اللوامه

او اواجهها بكل امان

شايف الصوره جوه مرايتى

شايف كل ملامح الخوف

مش مكسوف

عارف خط الوجع الـمـُعْـد ِى

تقاطيع الآه المحفوره

و الفزوره

لسه معايا و من غير حل

جايز المعطى ما كانش كفايه

و جايزغلطان ف استنباط

يمكن فزورتى استعباط

يمكن حلمى تسيبنى طروفه

و اروح واقع

و ادشدش كده قول مية حته

ما هو فى الواقع

كنت متبت ف حبال دايبه

و مفيش مانع

حبة غربه كده ع الماشى

و ارجع الملم روحى و انا ماشى

و اكسر من جوايا الصوره

و اخفى خطوط وجعى المحفوره

ممكن ارجع اشخبط تانى

تتحدانى؟

هارسم صوره جديده ف لوحتى

و تكون فيها ملامح منى

و مش مكسوره

اول مره بلامس وجعى

مؤلم جدا لابعد حد

بس بدوس على وجعى و واقف

ما انتاش شايف؟

مش راح اركع ادام حد

ايوه بكابر

لسه بعافر

ماشى لاخر سكة عند