عمرك حسيت بان الكون مره بيضيق عليك
و قبل ما يقفل مسامك مديت ايديك
و فتحت باب صغير على ممر ابيض منور ملوش حدود و لا فيه حد
و سرحت و ابتسمت
و اخدت نفسك بارتياح
و عدلت مشيتك و صفرت و انت ماشى و دندنت
و شوطت الهوا برجلك و قولت للهم تظظظظظظظ
و رفعت راسك للسما الزرقا و لبيت ندا الفراغ بالصمــــــــــت و القول الغير متـــــاح
مش صحيح الصمت فن ؟؟ ..
و رياضة روح .. ( قد تكون اجباريه) ..
لكنها مفيده .. زى اليوجا ..
تأمل و احتمال
و .... برد او نار
ده ف حالة الصمت المغلف بالـ ( تظ )
ده ف حالة الصمت المغلف بالـ ( تظ )
اما ف حالة الصمت المصحوب بالـ ( الزكام )
ده بيبقى صمت مرضى ..
بس مش مُعدى بالمره
يعنى مش شرط و انت مريض بالصمت أو بتتعالج بالصمت
تعدى اللى ادامك و تمنعه من الكلام و اكل النافوخ
و يفضل يا وولداه يجيبك يمين .. شمال مش نافع
يستفزك عشان تنطق
و انت فيه جواك شىء قافل كل مسامك
قالت صديقتى (ان الصمت ترف )
فقلت
و ساعات بيكون قرف
و ساعات بيكون قرف
و استخسار الكلام ف شىء مش هيفيد
( اكل دماغ ع الفاضى .. و المكتوب مكتوب)
.. و اللى بيروح جاى و اللى جاى بيروح
تصدقى انتى
اصل لسه ما نفذوش اختراع الشوارع الـ (one way ) عشان اللى يروح ما يرجعش...
مع انه اختراع كويس
من باب التغيير .. او التهييس الله اعلم
فقامت صديقتى باختراع جمله
( استفيدى برغى الاخرين فى حالة صمتك )
و رغم جودة ظاهر الاختراع و الله اعلم بباطنه
هقولك انى مش بقدر استفيد بالاختراع ده
مش قولتلك بتبقى ( فى الميه )
سامعه و شايفه بس ف الغالب مش حسه ..
حاجه قافله على كل مسامك
و الدنيا تلاهى
هناك 8 تعليقات:
اعتقد ان الكلام دا يحث علي التفكير
فمثلا هل صحيح الواحد ممكن يستفيد بصمت الاخرين؟
طيب لما الصمت فن ليه محدش بيقدر اني كتير بكون عايز اسكت؟
ياتري الواحد ممكن يكون عنده موهبة الصمت؟ مش هو فن بردو
مدونه جميلة وان شاء الله لن تكون الزيارة الاخيره
من موقعى .. فى الميه اللى احيانا تكون ساقعة و احيانا بتغلى زى النافوخ المليان علامات تعجب و استفهام
بقولك ان الصمت كمان متعة للصامت لما يوصل لمراتبه العليا و يمزجه بشوية صبر على شوية تعالى على ماهو فانى و مستهلك و قابل للتغير و لما بيكون سعى للكامل المطلق ... الغنى
و قرب من ذات لا تصد من ياتيها و لا ترد من يحتاج..
وده موضوع نبقى نتكلم فيه باذن الله
و الصمت مصيبة لما يكون متعة للمحيطين هنا بقى بيدق الف ناقوس خطر ..
و الصمت نعمة لما تلاقى الكون مصيدة و العيون مستنيه لحظة .. بوح علشان .. تطلع مخالب الشماتة و الغطرسة وشةي الكلاكيع اللى على الماشى ..
انا رغيت كتير خلينى اصمت شوية بقى
محبة .. كتير
الواحد ممكن يستفيد جدا بصمت الاخرين ( على الاقل هدوء و تامل ) لكن السؤال هل ممكن يستفيد برغى الاخرين ؟ ( و ده اللى اشك فيه اصله كتير بيكون صداع غير مرغوب فيه )
عجبتنى جملتك اوى ( لما الصمت فن ليه ما حدش بيقدر انى كتير بكون عايز اسكت ؟ )
و خلينى اضيف عليها .. ليه مش بيفهموا صمتك و بيصروا على خروجك منه ؟ ... يمكن محاوله طيبه منهم لاخراجك من عزله خايفين عليك منها ؟ يمكن
و كمان ردا على سؤالك انا قلت ( يعنى مش شرط و انت مريض بالصمت أو بتتعالج بالصمت
تعدى اللى ادامك و تمنعه من الكلام و اكل النافوخ )
الصمت مش مـُعدى بالمره
اما عن سؤالك ( يا ترى الواحد ممكن يكون عنده موهبة الصمت ؟ ) اقولك انى اظنها مكتسبه بفعل الزمن و اللامبالاه من الاحداث و التامل العميق اللى بيوصلك ان كتير الكلام ساعات ملوش قيمه
شادى
خليتنى تخليت عن صمتى هنا و رغيت كتير
بس ده لانه حوار هادف و مجدى جدا
اشكرك على زيارتك و سعيده بيها جدا
عمرك سمعتي صوت السكات
طب اسكتي وركزي
كمان
كمان
سامعة ايه
اوقات بيكون الصمت وسيلة تواصل
واوقات بيكون بحر هادر بس في حالة من الصمت المطلق
الصمت فن لمن يجيده
انا ما بعرفش اصمت الا في لحظات معينة
نفسي اتدرب علي فنون الصمت
سهر وفلسفة جميلة
ربنا يكرمك
يا سيداتى معذرة..
أنا لا أجيد القول ، قد أُنْسِيتُ في المنفى الكلام
وعرفتُ سرَّ الصمت.. كم ماتت على شفتيَّ في المنفى الحروف
الصمت ليس هنيهةً قبل الكلام ،
الصمت ليس هنيهة بين الكلام،
الصمت ليس هنيهة بعد الكلام،
الصمت حرف لا يخط ُّ ولا يقال
الصمت يعنى الصمت.. هل يعنى الجحيم سوى الجحيم ؟ !
نجيب سرور
سهر..عارفه المشكلة فى ايه
ان الصمت مش سكوت عن الكلام
لان دماغك بتتكلم من غير صوت
لوعرفتى توقفى الرغى الى جوا ده ازى
ارجوكى..تقولى
تحيه من مساحات واسعه فى القلب انتى وحشها اووووى
من موقعك اللى هو ف قلبى اكيد و انتى عارفه
بقولك ان طبعا مناقشات الصمت اللى بينا مش هتنتهى
و اقولك انى متفقه معاكى ف كل اللى قلتيه
لكن هقولك ان ساعات بيكون الصمت حاله دفاعيه للدماغ بتقوم بيها قبل ما تضرب بشويه صغيرين
حاجه زى قفلة النور عشان الاجهزه متتحرقش
ممكن يكون ضحية ما قبل القفله دى جهاز و لا اتنين من اللى مشغلين موتور الدماغ لكن ف النهايه بتبقى ماشيه
لكن مش محتمله تانى كلام
و فيه صمت مليان كلام و ده بيبقى ف حالات الاخلاص النادره
اللى انتى عارفاها طبعا
سمر
ماليه مساحات الصمت و الكلام دايما
عمرى سمعت صوت السكات |؟؟؟
يووووووووووووووووه كتييييييييييييييييير
انا مخلوق ليلى متامل ده م الاصل
لكن بفعل الزمن و الاحداث لقيتنى بفضل الصمت كتير على الكلام
معاك ان الصمت ساعات تواصل
و ساعات اكتر بيكون بحر هادر ( زى ما وصفته )
لكنه ساعات بيكون مجرد صمت
حاجه زى شد الفيشه و الجهاز وقف
يمكن عدم قدره على الكلام
يمكن عدم رغبه ف الكلام
يمكن حاله نفسيه
زهق
يمكن هتفتح ابواب كتير
استاذى جابر المصرى
مش عارفه اقولك اد ايه سعادتى بوجودك و حوارك
شوفى يا ساره
انا مش هعرف اقولك ازاى بتوقفى الرغى اللى جوا الدماغ
لانى من فتره بسيطه ما كنتش بقدر
لكن فجاه لقيت نفسى بقوم مفيش وش و لا رغى ف دماغى و اى موضوع بيبدا ف دماغى يزعجنى و كان حد ماشى ورا اى موضوع يضايقنى يجره و يربطه ف شجره و يكمم بقه
و لقيت الدماغ كلها هسسسسسسسسسسس
بس لقيتنى كمان عاوزه اقعد ساكته
و مش عاوزه اتكلم
يمكن بفكر من ورايا ؟ يمكن
بس الحاله دى للاسف ما بتدومش
لكن لقيتلها حل
انك تدوشيها انتى
اه و الله
لا ما اتجننتش لسه متخافيش
ايوه بدوش الدوشه
يعنى هتفكر ف موضوع و هتاخدنى ف فرضيات و جدليات اقوم انا ادوشها بجدول النهارده
مطلوب منى اعمل ايه ؟ اه عندى كذا و كذا و عندى المشاوير الفلانيه و عندى حاجات للبيت و لو لقيت وقت اعمل سيرش ف النت على الموضوع المهم بتاع الشغل او الكورس
و ارجع اقول يا سلام لو لقيت وقت و روحت للكوافير بس لا الوقت ضيق مش هينفع
تلاقى اليوم اتزحم و الدوشه اتدوشت منى و سكتت
هههههههه باين ده جنان بس مش مهم جربى
وحشانى يا ساره جدا جدا جدا
إرسال تعليق