لساك؟
لساك مشبوك مع طرف الماضى
لساك بتهاتى
و الخط الفاصل بين انت و انت بيكبر
و انت
بتفسر حلمك تباريح
و ف اخر التفسير بتصيح
بصوت مكتوم
و النور معدوم
و العتمه فردت ديل توبها المنقوش بهموم
قناديل القلب المطفيه
بتشب تدور ف الموجود
على سرسوب نور
و اليوم بيدور و يعيد نفسه
لكن مسروق منه الالوان
اصل التكرار اسود فى اسود
*********
لساك موجوع ؟
لساك بتغير ف الموضوع ؟
و بتخلط المك و يـَّا قرار تشربه ع الريق
و بتسند وجعك على عكاز رافضك يا رفيق
و بتكتب على قلبك اقرار رافض يا رجوع
و فاكر حيكون سهل الموضوع
طب وطى صريخ المك لجل اما يكون صوتك مسموع
و بلاش تتخبى ف ضيقة العين و بحركة حاجبك المرفوع
اصل انا يا صديقى بمـُر قرارك مش مخدوع
هناك 3 تعليقات:
لساي بقول وهظل اقول
ليه يا سهر خلصتي القول
جميل اوي
وحاسس لو كتبت اكتر مش هيعبر زي جميل اوي
العبقرى اسامه يس
و هل هناك اجمل من عبورك هنا و تشجيعك المستمر؟؟
دمت بهذه الاطلاله الرائعه
يابنت الإيه ياسهوره
ايه الحاجات الحلوه دى .. أنا واحده بتحبك أوى .. ياترى عرفتينى ؟
استنى أديكى أماره
حد من الستينات
إرسال تعليق