يا حلمى
يا اللى متشعلق على سطرين
و مستنيه يتحقق على فجرين
فجر و لسه حيشقشق
ما تعرف امتى ولا منين
و فجر و كان
بنتغنى ف حكاوى زمان
عن الفارس
و عن ضله اللى كان حارس
و ان النبت متأصل
و اتحسر
يصاحب قمرى كرباجه
ويجلد ضهر لياليه
و يسكن ليلى ف همومه
و يبكى البدر ف نجومه
فتتساقط
و اروح ساقط
من الايام
و اموت عايش
على الهامش
لا اكون انسان
و لا بيكون لى يوم عنوان
و لو ايامى تكتبنى
تشد الخط من تحتى
ما يرفعنى
اكون مكسوف
و تقلى خوف
اروح واقع
لتانى سطر
وقوع بيجيب وقوع تانى
و تبقى صفحتى فاضيه
تيجى القاضيه
فيكتب الزمن انى
هنا عديت
و اكمنى
خفيف جدا كما النسمه
فقدمى ما سابش و لا بصمه
هناك 6 تعليقات:
كالعاده بقف قدام نصوصك ومش بعرف اعلق اصلا الاسلوب اكبر من انه يتعلق عليه
على فكرة احقا للحق بس
انا من يوم ما كتبت عندما تتبعثر الاشياء وانا نفسى افتكر انا كنت كاتبها ليه او حتى رد على مين
واضح انها كانت رد على كلامك اللى فى اول المدونة وانا نسيت
عامة اسمحيلى انى اضيف مدونتك عندى
فى انتظار موفقتك واكيد راجع هنا تانى
الرائع تامر عبد الغنى مره واحده
يا نهار ابيض
بس على فكره الكلام اللى فى الاول ده كان هو اللى رد على عندما تتبعثر الاشياء مش العكس زى ما انت فكرت
ارجع باه تانى و افتكر كانت رد على مين
من غير ما اسمحلك ده شرف ليا انك تضيف مدونتى
و سعيده بجد جدا بوجودك هنا
رغم ان المكان قيد الانشاء لسه
لكن بجد نور بوجودك
من سطر لسطور تانية
و انا ماشية لوحديا
ومش بالكيف ولا بخاطرى
يكون حرفى ماهوش ليا
***
سهور يا جميلة
رغم انك كسلانة فى تكملة المدونة .. بس برضه تجنن ...
محبتى
سطور الحلم تعرفنى
انا الساكن ف طراطيفها
و لا خطيت ف عتبتها
و انا اللى بنيتها...... هدتها
و لا طاوعتنى سكتها
و خطوى لسه بيعلم
و قلبى عمره ما اتعلم
يطاطى لريح .. يسكتها
---------------------
اختى الغاليه سمر
عاوزه اشكرك على تحفيزى لعمل المدونه و على مساعدتى فيها
صحيح انا كسلانه عنها
بس طبعا مساعداتك فى تظبيط شكلها بتخلينى احبها و ان شاء الله اكملها
قولى يا رب
واكمني خفيف جدا كما النسمه !
بسيب جوه القلوب بصمه
متتحسش..
واشوف وش الهوى (العيّل)
بيتكرمش !!
وتتهمش .. حروف الروح
ومهمتش
وهيه أغنيّه واحده مصحباني بتملش ..
"خلاص" "عادي" "داميهمش"!!!
ــــــــ
الأستاذه / سهر
عندماتملأ الكلمات القلوب بعطر الأحساس
وفي طريقها تمر على العقول بفكر راقي
فهنا معادله كنت اظنها مستحيله للكثيرين (وانا منهم)
ولكنها تتحقق معك بمنتهى الانسيابية ودون أدنى اصطناع..
تحياتي لقلم احترمه
ـــــــــ
الكلام ده مش غريب
عشان الكلام بيحقق المعادله اللى نفيتها عن نفسك
لكل شخص بيكتب احساس بجد تلاقيله كلمه ممكن تقول انا فلان من غير ما يعرف اسمه
منورنى بشعرك و بكلماتك
إرسال تعليق