قطفة شتا

و دندنة الحروف ف القلب
انا سامع
و انا الفاهم
و ربى و ربك العالم
بحشرجة الحروف ف الصوت
و الف كلام
على طرف اللسان بيموت
و يعلن غيبة الحاضر
ملوش قلبى .. ف طقس النوح
و لا بكا ع اللى راح / ما يروح
انا القاضى
و انا االجلاد
و انا الراضى
بتصاريف الزهق .... لما ....
بتحكم فيا و تغالب
و انا الغالب
متقلقشى
على اوراقى
اذا اتشقت عطش لحروف

ارد بايه ؟
اقولك آه
و اوجع ..بالاهات قلب الورق
فيمل من حرفى
اقولك لأ ؟
اقولك حق ؟
قلبى يا قطفة شتا ..
بردان و مستنى
طعم الدفا حيره
و البرد له سطوه
و القلب له خطوه
برضاه يعديها
او غصب ..
لا قلبى ..
عمره ما كان مغصوب