الم ...... قلم

و لسه فيك روح
تروح
و تطلع الحرف بجروح
و يتصفى الكلام دمه
و اخر نقطتين منه
بتكتب نعى احساسك
و ايه ساسك
و ايه لجم حصان قولك
فـ ايه قولك ؟؟
توطى صوت صريخ صمتك و تصلب ف الغنا طولك

تصدقنى؟؟
بتوجعنى ..
ف كل مره ..
يتك الالم فيا ..
و انزف ..
من حروف سنى ..
وجع خاااالص

و تعابير الالم حاضره
و اصناف الوجع ساطره ..
ف صفحاتك
بدمعة حبر... آهاتى

تصدقنى؟؟
خلاص مليت ..
الم و جروح ..
و مليتك
خلاص جف المداد منى
و لايمينى ..
دراويشك
عشان ما نشدت اذكارك ..
بقالى يومين
و متمرد ..
على طقسك ..
و رافض انى اكون وصلك ..
بليل ..
هجر القمر ضيه
و ادندن
لجل يتسلطن
شبح ليلك
فدندن دمعتين المك لوحدك
و ابقى ارجع لى
صالب طولك
عشان قولك
ف قلب حروفى ..
ما يميلشى

احساس تفصيل

اخبار بالموجز و التفاصيل
احساس تفصيل
دا طويل و قصير
و جديدنا .. شانيل
ياخدك و يميل
يكشف و يغطى.. عيوب ... و كتير
ف المايله يطول
ف العدله قليل

كل المقاسات
لو قلتله هات
استاذ ف فنون صنع المتاهات
هتصدق ان الفن خطير
و ان الاحساس .. سينييه
و اصيل

مانيكان غلبان
مسجون..
فتارين
لجل اما ف مره الحظ يصيب
فيقابله نصيب
ياخد الفستان
قصدى الاحساس
و اوام هيسيبه تمام عريان

من تانى يعيد نفس التفاصيل

عـتـــــــــــــــــــــــــــــــــــــــــــــــاب

عارفه برغم انك ..
انتى اللى غرقانه
لساكى مدت ايد ..
بتنجى لو غارقين
عارفه برغم انك ..
يا حبيبه حيرانه
لساكى طيف قادر ..
يرشد خطا ضالين
عارفه برغم انك ..
مخنوقه جوايا
لساكى انتى براح ..
قادر يساع ملايين
عارفه برغم انك ..
متوحله بطينك
لسانى مستنى ..
ف بواقى خير باقيين
نبته تشق الطين
--------------------------------------------------

متسلميش يا ابواب ..
لقديم..
صدا قفلك
متهربيش بغباء ..
كده كل سكانك
ولا تكونى ..
كـ جزيره عطشانه ..
لحبة موج
متغربيش نظرات ..
اصدق محبينك
متركبييش الخوف ..
فـوق خيلك .. الامنين
لو لسه ف الصوره ..
ساكن شبح خوفك
لو لسه ف الحواديت ..
ابو رجل مسلوخه
لو لسه ف مرايتك ..
الصوره مشروخه
متكسريش برواز ..
ابطالك الباقيين
***************************
متسكنيش حلمى ..
على رف لو يعنى
متكسريش مجداف ..
بمبوطى .. واد جنى
عارف عدد موجك
و اللى ف جوف بحرك ..
عنه ما هوش خافي
بيهدى للموجه
و يعدى بالتانيه
و يخطى ف الثانيه
و الحسبه معروفه
عمره ما كان خواف
لكن بدأت اخاف
ليعلمه شطك ..
كان الولد رحال ..
و دى احلى ميزاته
لو بطل الترحال
قلبه هيسكن ايه ..
بلا شط و لا موجه ؟؟

تابع ..سيرك افكارى

وهيفيد الغنا طبعا

دا حتى الطير

ما يملكشى

لا قوت يومه

و لا نومه

و لا يقدر على همومه

لكن بيغنى طول يومه

السيرك ف ...

فقرته الجايه
هيعتمد الغنا المطروح
و ياخد من كلام شاعر
و يتفلسف بحبة بوح
و متسلسل صحيح لكن ..
دا هـُبْ ..
يفك سلسلته
عشان حاوى
عشان غاوى ..
الغنا المسموح
ما بيغنيش حلاوة روح
و لا ماشى على حبله ..
بيستعرض
خفة خطوة المجروح

صباح الفل
على جمهور بيتفرج
و مش شايف
و مش فاهم
و مش عايز
يفك العقده م الكرتون
ده متوقع
هديه
نسخه بالكربون
من كل اللى كان سابق
حروف بتنط تتسابق
و تاخد صفر
هتبقى الالفه ف الخيبه
و هى الالف ..
ف التكرار
ولا ينط بلياتشو
من العلبه
يقوله عليك
كمان واحد
طلعت حمار

سيرك افكارى

و بروض
وحوش قادره ..
تخلينى الملك ..
و انا..
لو مُلكى ..
كان غابه
ما يلزمنيش
فبتغابى
و بتذاكى
و باشاره
اسكن كل ......فــ مغاره

منيش حاوى
لكن غاوى
اشعلق ف الهوا حروفى
و اقع من حبل افكارى
فيشهق قلب جمهورى الورق
فاقوم
و من تانى
تنط الفكره ..

على حبل الكلام /فتوَلـَّع الحلقه ..

من التسقيف
على ..

بلياتشو يتدحرج
يدارى سقطتى و موتى
بوش بشوش
بيتدارى
ف دموع بتبوش

كارت الحريه

كارت الحريه يا مسكين

بخمسه و عشره و عشرين

ملطوش ف الشهر يا غلبان

كده اكل و شرب و دخان

و لان احوالك مش هيه

ازاى تتهجى الحريه ؟؟

********************************
كارت الحريه يا مسكين

بيشطب كل دقيقتين

اول ما تفكر تتكلم

هيقولك عفوا يا جميل

********************
كارت الحريه خلاص ضاع

من يوم ما شبابنا كمان صاع

لا وظيفه و لا حلم ببيت

م الاخر كده كله مشاع

*********************************************

كارت الحريه ده اوهام

تقريبا اضغاث احلام

لو يوم كده هتطالب بيها

يقولولك /راح تدفع كام

******************************************
كارت الحريه بصلاحيه /و تمنها العمر

و ساعات اعمار/ بيجرجر فيها /و بتكر

لكن الانسان ايه راح يسوى..

لو قال و ما كانش صحيح حر

******************************************
كارت الحريه يا مسكين

تتنفس قهر و اسافيـن

متربى على نسمه ابيه ؟؟؟

دلنى و انا اجيبهالك / فين ؟

*********************************
كـارت الـحريه ده امنـيه

و حكاوى و قصـه و اغنـيه

بنطـير فيهـا الاحـلام

لكـن ما بترجـع للغــيه

**************************
كـارت الحريـه ده اسفـاف

اعـلام و وسائله ما تنشـاف

علشـان مصطلـح الحريــه

بـاه مفهومـه خلـف خلاف

*******************************
كارت الحريه ملوش شارى

صلاحية وقته ال مش سارى

ف زمان كان لسه ما جاش وقته

و متأجل فى العصر الجارى

شاطر

شاطر اوى
ف ضمك خيوط الضى
قنديلك الهربان
بتقيده بالعافيه
و العتمه مش كافيه
لجلن يغيب شوفك
تغمض عيون خوفك
عديت لاحلامك
على جسر .. بتفكر
التجربه فشلت
الضى كان زايد؟
الضى كان كافى ؟
الضى كان ناقص
شغلت مهاراتك
و عملت الف نهار
فـَتـَحـِتْ عيون خوفك
شافه الامل .. فانهار
طبطبت اوجاعك
واحد صحيح شاطر
( واحد صحيح ) يشوفوك
و الحق باقى ( كسور)

__________________

فى المسأله الحسيه
حاجات
و افتراضات
و مش كل النتايج جت
من ضهر صحة..
معطيات
هنا الحسابات ..
هتتغير
واحد و واحد ..
مش هيسووا اتنين
و ساعات و لا يسووا شىء واحد
و مش واحد ..
تفاصيل الشعور و الحس
و لا بالجبر ..
تتوحد
و واحد .. مش شعور اوحد
ده ممكن يجمعوه الناس
و مش شرطك تكون بـ كسور
عشان تبقى صحيح .. بالغير
ده ممكن (غير) ..يكون هو اللى كان كسرك