كارت الحريه يا مسكين
بخمسه و عشره و عشرين
ملطوش ف الشهر يا غلبان
كده اكل و شرب و دخان
و لان احوالك مش هيه
ازاى تتهجى الحريه ؟؟
********************************
كارت الحريه يا مسكين
********************************
كارت الحريه يا مسكين
بيشطب كل دقيقتين
اول ما تفكر تتكلم
هيقولك عفوا يا جميل
********************
كارت الحريه خلاص ضاع
من يوم ما شبابنا كمان صاع
لا وظيفه و لا حلم ببيت
م الاخر كده كله مشاع
*********************************************
كارت الحريه ده اوهام
تقريبا اضغاث احلام
لو يوم كده هتطالب بيها
يقولولك /راح تدفع كام
******************************************
كارت الحريه بصلاحيه /و تمنها العمر
و ساعات اعمار/ بيجرجر فيها /و بتكر
لكن الانسان ايه راح يسوى..
لو قال و ما كانش صحيح حر
******************************************
كارت الحريه يا مسكين
تتنفس قهر و اسافيـن
متربى على نسمه ابيه ؟؟؟
دلنى و انا اجيبهالك / فين ؟
*********************************
كـارت الـحريه ده امنـيه
و حكاوى و قصـه و اغنـيه
بنطـير فيهـا الاحـلام
لكـن ما بترجـع للغــيه
**************************
كـارت الحريـه ده اسفـاف
اعـلام و وسائله ما تنشـاف
علشـان مصطلـح الحريــه
بـاه مفهومـه خلـف خلاف
*******************************
كارت الحريه ملوش شارى
صلاحية وقته ال مش سارى
ف زمان كان لسه ما جاش وقته
و متأجل فى العصر الجارى
هناك 26 تعليقًا:
Really excellent posting. Congrats. Happy Day!!!
فعلا كارت الحريه ده أمنيه
ولكن أي حريه
الحريه التي تعتدي وتنتهك المقدسات
أم الحريه التي تحترم الغير ومعتقداته وتجعل الفكر قريع الفكر
كارت الحريه ده ألوانه كتيره
ممكن أحمر وممكن أصفر
بس الرك على الإختيار
فكلاهما حريه
ولكنهما ليسى كبعضهما
بارك الله فيكي
تقبلي خالص تحياتي
Well, those 6 photos are of 6 terrorists. Terrorists who had killed the people of Iraq and Palestine. The poem is so that each one of us sees with the heart the images of the crimes that those 6 had made. Now, I want that the International Court also looks at for them. Tank you.
هو فين بس كارت الحريه ده وانا اشتريه
والله كلنا مفتقدين الكارت ده وبنجلم بيه دايما
بس طبعا اقصد الحريه اللى مش بتخرج عن نطاق الشرع
كلماتك حلوة اوى
على فكره
انتى رقيقه جداااااااااااا
من بعد اذنك يا قمر هحط مدونتك فى الريدر بتاعى عشان ابقى على تواصل معاكى
تحياتىليكى يا عسل
ريمان
بصراحة مش لاقى رد مناسب غير كلمات
الشاعر فاروق جويدة
فيا مصر صبرا على ما رأيت
جفاء الرفاق لشعب أمين
سيبقى نشيدك رغم الجراح
يضيء الطريق على الحائرين
سيبقى عبيرك بيت الغريب
وسيف الضعيف وحلم الحزين
سيبقى شبابك رغم الليالي
ضياء يشع على العالمين
فهيا اخلعي عنك ثوب الهموم
غدا سوف يأتي بما تحلمين...
بجد بوست هايل تسلم إيدك
بوست جاى فى وقتة بالنسبة ليا عالاقل
لان الحرية حتى لو كانت مسلوبة لازم نفتكرها نترحم حتى على ايامها انما احنا وصلنا لمرحلة محو الكلمة اساسا من قاوسنا كارت الحرية الكلمة فيها خلاصة الكلام بتدى معنى روحانى كبير للى فى عرف الحرية فعلا حتى لو مشفهاش طول عمرة
بوست يتقرى كالعادة مينفعش يتعلق علية فسمحينى بقى
بس . انا كنت مستنى بوست زى ده عشان اقول انك عديتى مرحلة الهواية ودخلتى فى شغل المحترفين اللى بيقولوا كلام كبير اوى .
بجد يا سهر الكلام جميل والمعانى اجمل وبتمسنا كمصريين اكتر كمان . وصدقتى فى اللى بيصدق حكاية الحرية دى انه بيبقى مسكين فعلا . وان جيتى للحق كلنا مساكين .
david
thx
u have a very wise blog
ahmed_k
اكيد يختلف باختلاف مفهومنا للحريه
لو افتكرنا ان تنتهى حريتك حين تبدا حريات الاخرين هنعرف نعرفها صح
ميرسى لمرورك المميز
david
i agree with u and wish that come one day
but wish doesn`t always come true
thx again
ريمان
اكيد ما بقصدش الحريه اللى بتتعدى حدود الشرع
ده انا اقصد اللى ف شرعنا جايزه و غيرنا عملولهم شرع لا تجوز
ميرسى لمرورك الجميل و طبعا يسعدنى طلبك الجميل
mohamed ghalia
و جيت و جبت اللى ما اقدرش غير انى انجنى احتراما لحرفه الرائع فاروق جويده
اشكرك ازاى ؟؟
واحد مش فاهم حاجه
مش مية مره اقولك غير اسمك ده !!!!!!!!
كل مره كلامك يقول انك فاهم كل حاجه
جاى ف توقيته ليك ( يمكن ليك اسبابك ) لكن متهيالى اننا ف امس الحاجه كلنا لكارت الحريه
هانى زينهم
ربنا ما يغلبلك مسكين ف كارت حريه ابدا
بس العمل ايه و كلنا هذا المسكين
و الله ما مسكين الا انا بسبب كم الغرور اللى هيصيبنى بكلامك ده
لا يا سيدى انا مش عاوزه اعدى انا مبسوطه هنا
منورنى كالعاده جدا و بتسعدنى جدا جدا
كارت الحريه موضوع جميل وكلمات أجمل يا سهر
أنتي حقاً مبدعه ونتمنى المزيد من التألق
ودي مدونتي التانيه و يسعدني زيارتك
http://fares-poet.blogspot.com/
السبع
ملخوم بالصراخ اللي في حلوقنا
أصدر قراره
بحظر تجوال الحروف
والاكسجين
نفسه الصناعي
بيوهمه أنه رقابي
جمع الرصاص والدببات والرشاشات
لضرب كل الميتين
الميتين أتجمعوا
من غير ولاد المنه
أحزاب المعارضه المعصومين
لا دنيا ولا دين لعباد الفشل
لا دنيا ولا دين لعباد الطغوت
بأوصيك
في أخر لحظه
علي خط أفتراق الصبح
واليل نهار
بعد أكتمال الشمس في عيون الرمال
ماتفر دمعه من عنيك
قبل أما تمسح من زمانك كل عار
قبل أما تمسح من زمانك كل عار
---
تحياتى
علي بديع حرفك
وأرجو الا أكون قد أزعجبتك بمداخلتى
تحياتى مرة أخرى
ايوا كدا
وحشتييينى
كلماتك جميلة وواقعية ولها مذاق مميز
بالتوفيق دائما
محمد عبد الرحمن شحاته
اشكرك على مرورك الجميل و تشجيعك
انتظر زيارتى فى القريب ان شاء الله
حقودى
موجوع يا قلبى و متهم ..
فعل العجز
و المحتجز ..
ف القلب ..
من صرخه و آاااااااااه ..
عدوا حدود الامتلا
مكسوره عينى و الحروف ..
مش بله ريق وجعى و لا ..
قادره تعبر عن بلا
لو ع البكا ..
ما يكفيناش ..
الولوله
لو ع الغنا ..
الاسى الحزين ..
قلبى اتملى
و ما عادش ع الحاوى ملام
لما بـِطـِل شغل الجلا
-------------------------
لو وعد كل مره هتجينى بمداخله روعه زى دى يبقى لو سمحت ازعجنى كتير بمداخلاتك الرائعه
الجميله موناليزا
و انا عماله اقول ناقص ايه ف الصفحه
اتارى انه كان ناقصنى انتى
كده انا تمام الحمد لله
ربنا يكرمك يا رب و يسعد قلبك
يا ريت والله يبقى فيه كارت الواحد يشحن بيه حريته
زي كروت ام نبيل كده
تدوينه رائعه
تسلم إيدك
واحد من الناس
و يا ريت ليه
جوانا كلنا اللى يشحنا بس احنا اللى سايبين الباترى ( too low )
نورتنى بجد لاول مره
و مدونتك جميله و كلها حكمه بجد
جميلة المعانى والتراكيب واللغة والصور يا سهر
بس خلى بالك ما تستسلميش لسحرالغنائية العالية
انا كمان بحاول اسيطر عليها فى شغلى بس برضة بتفلت منى
استاذى سمير مصباح
يا استاذى احنا نقع ف الغلطات دى عشان تلامذتكم لكن حضرتك بروعة حرفك مش ممكن
دايما تغيب و تيجى تعوضنى عن الغياب و تسعدنى
انا بحب كارت الحرية ده اوووى
وفاكرة الايام دى اوووووى
"تنهيدة قويه"
دوسي يا بنتتتتتتتتتتى
:)))))
و احلى ايام و احلى صحبه
و احلى ساره
و ايام اكتر من ساره
و فضل حبيبة قلبى ساره ربيع على روح الكتابه ف الايام دى
و فضل خاص لانك صاحبة فكرة ( كارت الحريه )
إرسال تعليق