تابع ..سيرك افكارى

وهيفيد الغنا طبعا

دا حتى الطير

ما يملكشى

لا قوت يومه

و لا نومه

و لا يقدر على همومه

لكن بيغنى طول يومه

السيرك ف ...

فقرته الجايه
هيعتمد الغنا المطروح
و ياخد من كلام شاعر
و يتفلسف بحبة بوح
و متسلسل صحيح لكن ..
دا هـُبْ ..
يفك سلسلته
عشان حاوى
عشان غاوى ..
الغنا المسموح
ما بيغنيش حلاوة روح
و لا ماشى على حبله ..
بيستعرض
خفة خطوة المجروح

صباح الفل
على جمهور بيتفرج
و مش شايف
و مش فاهم
و مش عايز
يفك العقده م الكرتون
ده متوقع
هديه
نسخه بالكربون
من كل اللى كان سابق
حروف بتنط تتسابق
و تاخد صفر
هتبقى الالفه ف الخيبه
و هى الالف ..
ف التكرار
ولا ينط بلياتشو
من العلبه
يقوله عليك
كمان واحد
طلعت حمار

سيرك افكارى

و بروض
وحوش قادره ..
تخلينى الملك ..
و انا..
لو مُلكى ..
كان غابه
ما يلزمنيش
فبتغابى
و بتذاكى
و باشاره
اسكن كل ......فــ مغاره

منيش حاوى
لكن غاوى
اشعلق ف الهوا حروفى
و اقع من حبل افكارى
فيشهق قلب جمهورى الورق
فاقوم
و من تانى
تنط الفكره ..

على حبل الكلام /فتوَلـَّع الحلقه ..

من التسقيف
على ..

بلياتشو يتدحرج
يدارى سقطتى و موتى
بوش بشوش
بيتدارى
ف دموع بتبوش

كارت الحريه

كارت الحريه يا مسكين

بخمسه و عشره و عشرين

ملطوش ف الشهر يا غلبان

كده اكل و شرب و دخان

و لان احوالك مش هيه

ازاى تتهجى الحريه ؟؟

********************************
كارت الحريه يا مسكين

بيشطب كل دقيقتين

اول ما تفكر تتكلم

هيقولك عفوا يا جميل

********************
كارت الحريه خلاص ضاع

من يوم ما شبابنا كمان صاع

لا وظيفه و لا حلم ببيت

م الاخر كده كله مشاع

*********************************************

كارت الحريه ده اوهام

تقريبا اضغاث احلام

لو يوم كده هتطالب بيها

يقولولك /راح تدفع كام

******************************************
كارت الحريه بصلاحيه /و تمنها العمر

و ساعات اعمار/ بيجرجر فيها /و بتكر

لكن الانسان ايه راح يسوى..

لو قال و ما كانش صحيح حر

******************************************
كارت الحريه يا مسكين

تتنفس قهر و اسافيـن

متربى على نسمه ابيه ؟؟؟

دلنى و انا اجيبهالك / فين ؟

*********************************
كـارت الـحريه ده امنـيه

و حكاوى و قصـه و اغنـيه

بنطـير فيهـا الاحـلام

لكـن ما بترجـع للغــيه

**************************
كـارت الحريـه ده اسفـاف

اعـلام و وسائله ما تنشـاف

علشـان مصطلـح الحريــه

بـاه مفهومـه خلـف خلاف

*******************************
كارت الحريه ملوش شارى

صلاحية وقته ال مش سارى

ف زمان كان لسه ما جاش وقته

و متأجل فى العصر الجارى

شاطر

شاطر اوى
ف ضمك خيوط الضى
قنديلك الهربان
بتقيده بالعافيه
و العتمه مش كافيه
لجلن يغيب شوفك
تغمض عيون خوفك
عديت لاحلامك
على جسر .. بتفكر
التجربه فشلت
الضى كان زايد؟
الضى كان كافى ؟
الضى كان ناقص
شغلت مهاراتك
و عملت الف نهار
فـَتـَحـِتْ عيون خوفك
شافه الامل .. فانهار
طبطبت اوجاعك
واحد صحيح شاطر
( واحد صحيح ) يشوفوك
و الحق باقى ( كسور)

__________________

فى المسأله الحسيه
حاجات
و افتراضات
و مش كل النتايج جت
من ضهر صحة..
معطيات
هنا الحسابات ..
هتتغير
واحد و واحد ..
مش هيسووا اتنين
و ساعات و لا يسووا شىء واحد
و مش واحد ..
تفاصيل الشعور و الحس
و لا بالجبر ..
تتوحد
و واحد .. مش شعور اوحد
ده ممكن يجمعوه الناس
و مش شرطك تكون بـ كسور
عشان تبقى صحيح .. بالغير
ده ممكن (غير) ..يكون هو اللى كان كسرك

كدبة دفا

خوفك و صمتك
و ارتعاشات السؤال
ف حضن برد الاجوبه

باصص بعينك ع الدفا
وخايف تقرب
لـ الشمس
تلسعك بلسانها
و تغيظك
(انذار الدفا ... كداااااااااااااااب)

على ِ سور الصمت
و اصبر
كدبة لاقتحام ... خداااااع
مش شجاع
رغم امجاد البطوله
و الشهاده ..
م اللى شاهد
و انت متشاهد ..
ممدد
مستنى موت؟؟
وف الحالتين .. هتتكفر
منيش شايف
خطية حلو احساسك
ذنوب عنها بتستغفر
فـ لا تعفر
شيبة قلبك
دا شب ف قلبها
و كبَّـر
ادان الفجر ف ودانه
اوام كبَّـر
اوان الحلم ف احضانه
و ساب حلمه ف صندوقه
و قال راجع .....................................

...............................

ليه لون الحلم .. اتغير
صبح باهت
قلوب شابت
قفل ع الحلم من تانى
مرار الحلم مش اوحش و لا اطعم

ساديزم ... مجموعه قصصيه لمحمد الغزالى

ساديزم ( رؤية قارىء)
يجب ان انوه اننى لا املك ادوات الناقد و لكنى املك رؤيتى الفقيره كقارىء

مجموعه مميزه فى كل قصصها ، تستطيع ان تتنفس رائحة علم النفس تطل عليك من معظم الفقرات و خلفيه ثقافيه و دينيه تفرض نفسها على الاحداث ، تم توظيفها جيدا و ليس فقط من باب الاستعراض.
بدأت كل قصه بجمله رائعه خاطفه للانتباه - لا تملك الا ان تعود لقرائتها ثانية بعد الانتهاء من القراءه – لها مدلولها فى القصه تعكس ثقافة الكاتب المتنوعه .. فتنوعت بين آيه قرآنيه و حديث شريف و قول و شعر و احيانا جمله مميزه من القصه .
(خطة نابليون )
اختيرت لتكون اولى قصص المجموعه و هى – للوهله الاولى – اصعبهم قراءه يميزها طولها – نوعا – و تقاطع احداثها و تصاعدها وصولا الى النهايه الغير متوقعه .
يبدو جليا ان الراوى يدرك جيدا اللعبه – الشطرنج – و يملك زمام الاحداث فهو يتنقل بخفه و ذكاء للامام و للخلف معتمدا على ادراكه الجيد و دهاءه .
( رساله من انثى )
وجدتها اكثر القصص مباشرة و ان كانت لا تخلو من الاستخدام الجيد للالفاظ .
( البديل )
قصة الثلاث اطراف فى المعضله العاطفيه ، قد تكون سردا لاحداث واقعيه مكرره فى الواقع .
( الفراشه )
هى الاروع من وجهة نظرى على الاطلاق بالرغم من انها تشبه فى الخط الرئيسى فكرة " البديل " بتمركز الثلاث شخصيات الرئيسيه ، الا انه هنا تم التناول بشكل مختلف و برؤيه اعمق للشخصيتين.
يبدو اعتزاز الراوى بشخصية البطل فى الفقره التاليه ( الصقور و النسور طيور جارحه و برغم ان الاثنين لهم نفس الكبرياء الا ان النسور بتاكل الميت .. او الضعيف .. الصقور بترفض ده مش بتلتهم فريستها غير و هى قويه ..)
( ساديزم )
عالق فى ذاكرتنا دوما نفور من الشخصيات الساديه .. نجح الكاتب فى اخر فقره ان يكسبنا تعاطف مع الشخصيه الساديه ( مريض لم يتلق علاجا او ابعادا لخطره عن الاخرين ).
( آسر )
هى قصه بحق تطرق باب قلبك برفق و تهزه بشده بشده و تتركه لينا ً.
جاء الاسم ( للقصه و للشخصيه ) موفق جدا ً.
( طبعا انا ملحد )
عنوان صادم .. مستفز .. يدعوك للبحث و متابعة العمل ان كنت معتدلا ً و لا تكون آرائك من السطح ، فإذا توغلت فى العمل تجد انك غير مستاء بالمره الا مما يستدعى الاستياء فعلا ( مسلمين بلا اسلام ) .
اسعدتنى شخصية ( محمد ) الذى تكاد تراه رؤى العين و لا تراه فى ذات الوقت لشفافية روحه ، مسلم معتدل بمعنى الاعتدال الحق ، يدرك روح الدين ، يلمس روحك حواره و هدوءه و اتزانه ...
( يبدو جلياً خلفية الكاتب الدينيه ) .
( البدين )
( ان الله لا ينظر الى صوركم و اموالكم و لكن ينظر الى قلوبكم و اعمالكم)
ببساطه القصه تتناول الجدل الدائم حول المظهر و المضمون فى تقييمنا للاخرين و لانفسنا ( جزء منا يبقى لا يخلو من السطحيه ).
********************************************************
نرجع تانى من التفاصيل للاجمال
فضلت ( الفراشه ) عن ( ساديزم ) لانها القصه الاروع من وجهة نظرى الى جانب ( طبعا انا ملحد ) و ان كان اختيار اسم ( ساديزم ) جاء موفقا جدا لانه جاذب جدا بعكس ( الفراشه ) الذى سيبدو غير ملفت تجاريا للمجموعه ( عادى نوعا ) و على عكس ايضا ( انا ملحد ) لان رغم جاذبية العنوان و لفته للانظار الا انه يعطى انطباعا قد يـُساء فهمه .

ايضا الكثير من الجمل المميزه جدا فرضت نفسها لدرجة انها تملكك و تاخدك معها لفتره و انت تقرا .. اذا حاولت ان اذكرها كلها ساحتاج الى صفحات ( بدون مجامله ) لذا ساذكر مقتطفات فقط ...

( انا النار .. ايمكنك ان تلوم النيران على انها احرقتك ؟ انت من غرك لونها المبهر فاقتربت لتحترق .. ) ........ساديزم
_____
( ثمة اناس تخنق ذكراك قلوبهم .. فيحيون ، و ثمة اناس .. تخنقك ذكراهم .. فتموت !! و ما بين حياتهم و موتك .. تصير قبرا يلتحف بنفسه ..تعد كم شخص مر بك و سكنك .. و لا تعى انك من خلالهم ايضا .. تدفن روحك )
( ايكون الالم هو ما ينطق باوردتنا فيأمرنا بان نحترق وجعا ام نحن من يطلق بارادتنا دفقات من الحنين و الوجع الى جوارحنا ؟؟ )
( اتيت بك من مسافة ذاكرة قديمه .. قطعتها ما بين احساسى بحرارة كوب من القهوه .... و وجودك ! لم تكن باكثر من مسافه عابره للزمن .. ما تجاوزت من وقتها عمق خيبتى فيك ! و الان وحدى .. امام كوب قهوه .. و على حواف موجه بارده من الحنين اذ بوجودك عميقا يشاطرنى القهوه و حواسى !! ترى .. اى خيبة جديده حملتها ذكراك لى .. فى مكان اعتاد لقاءنا .. دائما ؟؟!! )
( افكارك و الجنون وجهان لعمله واحده و قلبى هو العمله الاخرى التى يتركها ظل عملتك على الارض )
....... الفراشه
_______________

بالتوفيق يا محمد

هلاويس رحله ..و امرى و امركم لله

ما سر القلم المقصوف؟!

هل هو اشاره لعدم البدء فى تدوين .... هلاويس!!!

بس على مييييييييين !! رحله و ليل و نيل و لحظة هسسسسسسسسسسس وحيده اقتنصتها يبقى لازم نسيب للقلم فرصته يهلوس حتى لو كان مقصوف .... رقبه

عيوب النظر

فيه ناس بتعانى من طول نظر .. ما بتشوفش الا اللى بعيد عنها .. مع ان المنطق انك تشوف الاقرب اوضح .. هنا يظهر مثال على عكس المثل المعروف ليكون .. ( البعيد عن العين .. قريب م القلب )

و فيه ناس عندها قصر نظر .. بتشوف بس تحت رجليها و مش ابعد من كده ..

واضح ان الكلام مش عن البصر عن البصيره .. فالاول عيب خلقى ( بفتح الخاء ) و التانى عيب .......... ما علينا

و فتح عينك تاكل .....( مقلب )

تصدق انك لو فتحت عينيك اوى و ما رمشتش ، هتكتشف ان فيه حاجات عدت من ادامك و ما شوفتهاش ...( من تجربة واحد ناصح .. او كان فاكر انه كده )

صديق و حته ف قلبك

صديق عمل موقف مش قادر تتجاوزه .. زعلت منه اوى . قمت مخرجه من الحته اللى سكنته فيها ف قلبك ... بس و هو خارج يا اما يسيب اثاره ف الحته دى فما تسمحش باستقبال اخرين .... او و هو خارج ياخد الحته دى معاه .. و فى الحاله الاخيره هتفرح ف الاول لانك قدرت تعدى بسرعه و مش زعلان و لا ندمان عليه .. بس بعد كام صديق هتكتشف ان ما عندكش قلب تستقبل فيه صديق .. تبدأ تستقبلهم فى اماكن ترانزيت عشان كده ما بيطولوش ... ( و رحمة قلبى بتكلم جد )

محطات

ف اول الرحله يركب معاك واحد لطيف - القلب - و انت ماشى يتقل عليك راكب تانى .. غتت حبتين .. يروشك .. يرغى كتير و يناكف اكتر ....ايييييييييوه عقلك. بعد كام محطه يكونوا الراكبين بيتجادلوا و يتخانقوا و ممرمطينك ف النص .. يا يبقى حظك حلو و واحد منهم يسلم للتانى و ينزل المحطه الجايه ... و يا بختك بأه لو نزلوا الاتنين .. بس الاغلب ان انت لما بتيجى محطتك بتنزل .. و يكتشفوا انهم كانوا بيتخانقوا على ...... ما فيش