و لسه فيك روح
تروح
و تطلع الحرف بجروح
و يتصفى الكلام دمه
و اخر نقطتين منه
بتكتب نعى احساسك
و ايه ساسك
و ايه لجم حصان قولك
فـ ايه قولك ؟؟
توطى صوت صريخ صمتك و تصلب ف الغنا طولك
تصدقنى؟؟
بتوجعنى ..
ف كل مره ..
يتك الالم فيا ..
و انزف ..
من حروف سنى ..
وجع خاااالص
و تعابير الالم حاضره
و اصناف الوجع ساطره ..
ف صفحاتك
بدمعة حبر... آهاتى
تصدقنى؟؟
خلاص مليت ..
الم و جروح ..
و مليتك
خلاص جف المداد منى
و لايمينى ..
دراويشك
عشان ما نشدت اذكارك ..
بقالى يومين
و متمرد ..
على طقسك ..
و رافض انى اكون وصلك ..
بليل ..
هجر القمر ضيه
و ادندن
لجل يتسلطن
شبح ليلك
فدندن دمعتين المك لوحدك
و ابقى ارجع لى
صالب طولك
عشان قولك
ف قلب حروفى ..
ما يميلشى
بتوجعنى ..
ف كل مره ..
يتك الالم فيا ..
و انزف ..
من حروف سنى ..
وجع خاااالص
و تعابير الالم حاضره
و اصناف الوجع ساطره ..
ف صفحاتك
بدمعة حبر... آهاتى
تصدقنى؟؟
خلاص مليت ..
الم و جروح ..
و مليتك
خلاص جف المداد منى
و لايمينى ..
دراويشك
عشان ما نشدت اذكارك ..
بقالى يومين
و متمرد ..
على طقسك ..
و رافض انى اكون وصلك ..
بليل ..
هجر القمر ضيه
و ادندن
لجل يتسلطن
شبح ليلك
فدندن دمعتين المك لوحدك
و ابقى ارجع لى
صالب طولك
عشان قولك
ف قلب حروفى ..
ما يميلشى
هناك 43 تعليقًا:
بقى بتحسبنى عليا انا؟
طيب انتى يتعمل فيكى ايه؟
نتصرفوه فيكى اززززززى؟
..
يا جبروتك يا سهر
:))
اه
قادرة يا نااااااس
..
مش باقى مني اى حاجة
خااااااالص
ساره صاحبة لينك الافترا الاعظم
مش باقى منى غير شوية ضى انا مش عايزهم
السهر ف الضلمه رومانسى برضو و زى الفل
منور يا قمر انت
(ألم) تعرف ؟؟
(ألم) تقرأ ...؟؟
هسيبني م الفصيح
يا فصيح !
و م العامّي ومن وشه
الّ بيزّهق
بأشباه قولة : الآهه
ولفظ : جريح
واسيب صِدري نفس ف الريح
وينهجني
اقَفّ/
لو حتى مش على أرض !
(تعبت بجد)
قراية كف (إحساسي) عبث مني
أنا و(هوّه)
عبث خايف ..!
على وجودنا
من اللا شئ
تصدّق ؟؟
أعلى خيلي مُنااااه
يغمّي الآسئلة بهدنه !
هسيب
وهسيب ....
ومش ضايف ..
غير الآتي :
(مع عشق الحروف /
دمّي
بيتصفّى ف حكاياتي
وأقول (ملّيت)
وأنا اللي مَليت
عروقي بدم كلماتي)
...........
...........
من غير مجاملة انا غنيتها وانا بقراها روعة والله
وما تعبتوش ؟
ندا ساكت ..
لساد حامد
و تسبيلة
تسرق م الضلام ستره
و تنهيده
تحرق م الكلام سطره
و تعبيره
شئ غيره ومش مفهوم
و ما تعبتوش؟
نغنى للقلم و النوح
و نتسمر
وسط جروح تفتتنا
و تفتنا
قوله غنوة تردد
فنتردد
و نرجع تانى م الاول
نقول ونعيد
و ايه هايفيد؟
ف نغنى للألم و البوح
و .....
اه يا اخضرانى الروح
يا متوصى
على صبرى
تنقر له
فيرقص لك
على نغمك
وانا ( ازغرله )
فيتراجع
وتتلون خدوده بشوق
فيسهر لك ..
سمر :
وما تعبتوش ؟
.....
نغنى للقلم و النوح
و نتسمر
ــــــــ
ونتــسمّر
و وقت الحركة
خلفاً در
.
.
حروف فالصو
بتنزفها شفايف ماس
عشان ترضِي/
أنوثتها
وتغري رجولة الإحساس
فـ ما يصدّق
يقف ضعفُه/
على ضوفْرُه يشبّ لها
ويتهوّر /
يــ(.....)
يسبـ لها !/
و يستغفر... بلا توبه
وميت نوبه
يجيب منها /
حروف
مكتوبه باسم الليل
بخوف منسوبه
للمجهول
وقبل ما بتبدي توأوأ !
بتتريّق
على لهفتنا للغلطة
وتكرارها
وما تعبناش!!
.........
.........
بالتأكيد
لن أقدم اعتذار عن التأخير
فالأولى
أن أعتذر لذاتي
لأنني وحدي من حرم من المتعة هنا
و أظنني لن أقبل لي أعذارا
سهر
فعلا
انا كمان غنيتها
هانى رمضان
و دندنة الحروف ف القلب
انا سامع
و انا الفاهم
و ربى و ربك العالم
بحشرجة الحروف ف الصوت
و الف كلام
على طرف اللسان بيموت
و يعلن غيبة الحاضر
ملوش قلبى .. ف طقس النوح
و لا بكا ع اللى راح / ما يروح
انا القاضى
و انا االجلاد
و انا الراضى
بتصاريف الزهق .... لما ....
بتحكم فيا و تغالب
انا الغالب
متقلقشى
على اوراقى
اذا اتشقت
عطش لحروف
كلام حسام
كان نفسى اسمعها غنيتها ازاى
مليون ميرسى
سمر
ارد بايه ؟
اقولك آه
و اوجع ..بالاهات قلب الورق
فيمل من حرفى
اقولك لأ ؟
اقولك حق ؟
قلبى يا قطفة شتا ..
بردان و مستنى
طعم الدفا حيره
و البرد له سطوه
و القلب له خطوه
برضاه يعديها
او غصب ..
لا قلبى ..
عمره ما كان مغصوب
د.احمد عثمان
انا كمان مش مسامحه
عشان مرورك مميز و كمان مش مسامحه عشان مفيش بلوج جديد من فتره عندك
و ما تقولش الكلمه خارج نطاق الخدمه
جميلة قوى يا سهر
تحياتى
سهر
..
المرة دي صعب قووي أعلق ..
بجد
الكلام حاساه قووي ..
كأنه طالع مني
...
بس انا عمري ماهكتبه بالجمال ده
هرجع اقراه تاني وتالت
(:
كل حبي ..
الست فرويد
مرورك اسعدنى جدا جدا و كمان جدا
مش عشان جيتى و قولتى ان النص عجبك
عشان خليتينى اروح مكانك و اتعرف على حروفك
ميرام
ترجعى تانى و تالت و ميه ده يسعدنى
لكن تقدرى تكتبى احلى من كده ده اكييييييييييد
طب وانتى ايه اللى مسكتك على نفسك كدة يا بنتى !! الكلام اللى باقراه هنا صدقينى اجمل وارقى بكتير من كلام تانى باشوفه منشور فى دواووين تانية واصحابها مشهورين كمان .
القلم والالم وجعونا يا سهر ويبدو ان المود بتاعك لسة مسيطر عليكى شوية . دمتى مبدعة كما عهدناكى .
حاجة جميلة اوي
انا استمتعت بالردود اوي اوي
اللي ماشية ورا نصك :)
سهر ..
اكتر حاجة بحبها في اللي بتكتبيه .. ان دايما راسك فوق :)
دايماااااا :)
و سلامة القلم .. من الألم .
هانى زينهم
صباح الفل
اهو ده الكلام اللى هيتسبب ف جرعة غرور زايده تودى بحياتى المستقره معاكم هنا
ربنا يخليك يا رب على مجاملتك الجميله
المشروع قيد التفكير فعلا بس ما وصلش لحيز تنفيذ لسه
اما عن المود فهو بخير و الحمد لله
القلم هو اللى مزرجن شويه بس
هو انا قولتلك قبل كده ان مرورك مهم و ضرورى ف اى بوست جديد ؟ طي ادينى قولت
شيماء الجميله اللى بحب جدا قهوتها بالفانيليا و اللى كانت حرمانى منها شويه بس جابتلى قهوه تريبل تجنن عدلت مزاجى
انا كمان بجد بحب اوى التفاعلات دى
و بعدين هو القلم لو راسه مش مرفوعه هيكتب ازاى ؟ ده يبقى حرفه مايل و انا بصراحه ما بحبوش
لكن بحب اوى اوى مرورك اد ما بحب قهوتك ف بلوجك لا بحب قهوتك اكتر
هانى رمضان ...
---
ورق .... ورق ..
فى ثانية واحدة ...
يتحَرق ...
و تبقى العروسة
و العريس ..
رماد بيطير
مع الوهم الساكن فيك
فيا ..
و الحلم التايه منك
ليا
****
ومين هائغش ؟
شفايف ماس
تجرح
بارد الاحساس
دلال/ تمثيل
تدارى شَعرها الابيض ..
بهم تقيل ..
و تكتب شِــعرها المصبوغ
باهاته
كما المواويل
تغرى رجولة مش هاتكون
مهو التانى ...
عامل انه ..بيعانى
وهو ف دنيته الورقة ..
بيتصبر
على فراقه
لروحه / لنفسه و لدنيا
بيرسمها باوجاعه
وينطقها حروف صارخة
توجع اول الواصلين
رصيف قلبه
...
ويصفر قطر هجرانه
وترجع تانى للوحدة
تفتتها
فتتسلى
بطابور طامعين
كمان فاكرين
ان عيونها ورموشها
...
اوتيل فاضى
حاطط يافطة الترحيب
سهر ..
----
قلبى يا قلبى يا مدارى
وجع كامن فى نبض ضعيف
بيداوى
جروح ياما ..
بتتسند على زهقى
فتكتب كلمة و التانية
تكسر سن احساسى
يعند حس وسواسى
فيعلا اكتر ...
تايب قلمى عن نوحه
و تايب المى عن بوحه
و تابت قلبى م الاحباب
وحالف انه يهجرهم
عشان خانوا
صدق الاهة و الغنوة
نقول ألم روح
بس نطق به القلم
الكلام هنا
نقول موجع اوى
سلمتى يا سهوره
جميله الروح والقلم
و تطلع الحرف بجروح
و يتصفى الكلام دمه
و اخر نقطتين منه
بتكتب نعى احساسك
*********
مؤلمة اوي ياسهر
واحساسك بارز فيها
و ايه ساسك
و ايه لجم حصان قولك
فـ ايه قولك ؟؟
باجى هنا علشان اقا شعر بجد
سمر
و لو وجع الالم يتك على حرفك
ما تجبريهوش
من حبره ينزف
ع الورق
صوتك
نغم حزنان
يمكن
ما هوش ندمان
جايز
لكن حيران
ده اكيد
بمناسبة التاكيد
انا كنت متاكد
من حاجه
و لقيتنى
من بعدها راح اشك
ف حاجات ..
بدون تحديد
بستان الرقه بسنت
نقول ناقص روح و عشان كده القلم بيأن
ايه رايك انتى
طب اقولك رايى انا
بحب مرورك اللى بيعاكس الاحساس و التفكير
( من المعاكسه مش المخالفه )
كيارا
الجميله التى تقرأ بقلبها
دايما تحطى ايدك على وجع و تتألمى منه
قدر كل من يحمل قلب مثلك
استاذى سمير مصباح
شرف انك تيجى
و شرف اكتر و مصدر فخر انك تيجى و تقرا شعر
و اكيد اكبر سعادتى لما اجى انا عندك و اتعلم و استمتع
تصدقنى؟؟
بتوجعنى ..
ف كل مره ..
يتك الالم فيا ..
و انزف ..
من حروف سنى ..
وجع خاااالص
و تعابير الالم حاضره
و اصناف الوجع ساطره ..
ف صفحاتك
...
مش لاقية غير الآه يا سهر
ربنا يسامحك على ابداعك اللي بيوجع ده
اسماء
ربنا يسامحنا جميعا
و لو ان وجعك بيمتعنى اوى لما بيكون ف ابداعك
دومى جميله
ربنا يخليكي ياقمر انا موش قد الكلام الحلو دا
بوست رائع وخاطرة اروع وان ملئها الحزن التمرد لكنها تنم عن بساطتك وطيوب طيبتك..حلم..
بتكتب نعى احساسك
و ايه ساسك
و ايه لجم حصان قولك
فـ ايه قولك ؟؟
كثير من الاقلام لجمت ولم يبق سوى القليل
اعتذر عن الغياب للامتحانات
تحياتى دوما وخالص مودتى
لسه فيا روح ليكي
أناديلك ..أغنيلك
أبص لروحي ألاقيكي
في أيامي ..في أحلامي
في رسم العمر في عنيكي
يعني بنحاول زي حضرتك
شعرك العامي جميل جدا
كيارا
اده و اكتر كمان
بس الكلام مش دايما بيكفى يقول
حلم
مرورك كانه الحلم
للحلم رونق خاص .. يجمع من الواقع و يختصر
هكذا كان مرورك
الازهرى
اكيد البلوج به مكان خال يفتقد تعليقك
اشكرك على تعليقك المجامل جدا
شجر الليمون
فصحاك جميله و معبره
و كذلك عاميتك
دى مش محاوله
ده نفاعل جيد و جدا
راااااااااااااائعه
كعادتك
بجد والله أنت بتكتبي باحترافيه عاليه جدا
وبروح مصريه نادره أوي الأيام دي
تحياتي
شكرا على سؤالك يا سهر بجد والله انتى كمان حد انا بعتز بيه جدا وبحترمه وبحترم قلمه كتير
بالنسبة لسؤالك انا مش بكتب فعلا بقالى كتير لانى خسرت الالهام بتاعى ورغم كل دا بكابر
ان شاء الله قريب هيكون فى جديد انا كنت بعمل مدونة تانية على فكرة ووقفت الشغل فيها هى كمان كانت مدونة سينمائية لان السينما دى عشقى الكبير هى والمسرح وربنا كبير يا سهر
دعواتك وان شاء الله نتواصل دايما وشكرا كمان مرة على سؤالك
واحد من الناس
شهاده بجد اعتز بيها جدا جدا
مليون ميرسى
هانى سعيد
لو صبر القاتل
كنت كمان هقولك انت ليه عندك بلوج ( المملكه ) مش مفتوح للجمهور
و قلت ف نفسى ايه البواخه دى مش يمكن ده خاص بيه و مش عاوز يفتحه
بس انا روحته عشان افتكرت انه مقر النشاط الجديد اما لقيت نشاطك متوقف ف القديم
الالهام ما بنخسروش
الالهام بيتجدد
و طول ما الواحد فيه روح بيبوح
فى انتظار جديدك ف القريب جدا ان شاء الله
يا سلام ...رائعة يا سهر و احساس شديد الشفافية...ربنا يزيدك :)
إرسال تعليق