مخدوع

مخدوع
موجوع؟؟
لساك ما اتعودتش المك؟؟
و تقيل همك
بتجرجر فيه
و يجرجر فيك
قلبلى ف اوراقك بثبات
شوفت الصفحات ؟
حرف مكشر
و نقط منتوره ف بسمه ساعات

تغمس للفتحه بطرف العين

و تطلع اوى للكسره لسان

و تضم الضمه بعزم الآه

فتلملم احساسى الفلتان
و سكون
يفرض ع الصفحه سكوت
يتخنق النور
و الحرف ف ضلمة صفحه يبات
و يضيق ف عنيك
وسع الملكوت
فتولع شمعه
ف اخر طرف العايش فيك
تمسحها عنيك
و تقول هتفوت
و... تموت

محتاج يا شاعر ...

محتاج يا شاعر اسمعك

رد السكات ما بقاش يحل المعضله

مش راح تفيد المصمصه

و هز الكتاف

و لا علو صوت و المهيصه

محتاج يا شاعر اسمعَّك

تفاصيل حدود المهزله

المسأله

مش كلمتين

تاعبين ودانا من سنين

عن حلم اجدادنا الكبير

بحفيد يصون اللى اتبنا

او غنوتين متكررين

كنا زمان

كان يا ما كان

كان فيه هرم

تناتيف حضارات القدم

ف النومه نصبح مطرودين

من ضمة السبعه العجب

و نزيد عجب

لما الكلام

يركب عليه اجدع لجام

و يقوله حا و شى و يسسسس

ما تقولشى ... بس

ما اسمعش حس

و يقوله فكر مرتين

يا تنخرس

يا تنحبس

و ف قلب طواحين دنيتك راح تنهرس

يبقى انهرس انا من سكات

و لا نقول و لو تمن الكلمه الممات؟؟

فى مشاوير الحياه

فى مشاوير الحياه دايما

بنتلاقى

برغم زحام

وشوش

و حطام ..

بواقى الناس

بنعرفهم

من الاحساس

يبص القلب ويشاور

و يوصف فى ملامحهم

بنعرفهم

و نوصفهم

و ... بنسيبهم

و بنكمل

و من غيرهم

فى مشاوير الحياه دايما
__________________

وش بشوش ( تناتيش احساس)

صوت البكا منتوش

من قلب كله انين

راسم رتوش لوشوش

يا الحزن يا المنقوش

فارق باه حكايتى

و افتكرى يا مرايتى

كان فيكى وش بشوش

هلاهيـــــــل احســـــــاس

هلاهيل احساس

على عربية يد

اتفرج يا المكروب بهموم

هداك كده هد

الوجع الناهش بيصرخ

و لابعد حد

لكن بلا صوت

ما انتاش موجود؟؟

لا ده انت اهوه بين كراكيبك

ناطقين عيبك

لغتك يا جماد

بتقولى انسد

و ابطل نوحى

و مدبوحى ..

لدموعى يشد

و بكاك صامت

لكن واعى

ماشى تنادى على اوجاعى

على عربية يد

هلاهيــــــــــل احســــــــاس
__________________

آخر قشة صاحب

مقدمه

نازف من جوه القلب ... لساه متمسك باخر قشة صاحب
من جوه حدود الوجع الساكن ...

من قلب الجرح ..

مادد ايده و متمنى شعاع الضى الساكن ف الامل المقطوع ..

هيكون ؟؟ يمكن ... جايز

--------------

من طرف التوب المتمزع تناتيش تناتيش ..

و انا خايف منى تروح ماتجيش
بترجى ف اطراف الذكرى ...

و بنادى عليها بعلو الصوت

و ما سمعتنيش
و بـَرُجْ ف مومياك الصامت ..

ساكت طب ليه ؟؟
حلفتك بالحلم الفايت من يوم فايت ..

ما تودعنيش

مع آخر انفاسى الطالعه
من قلبى النازف بيك
بناديك
و اترجى ف اصداف صحوبيه
احساسى السافر بيسافر
و بيرجع بيك
محفور على صفحات جدرانه
قلبى مكانه
لسه مكانى
جواك ولا
مخدوع انا فيك؟؟

و فاجئنى بجملة اوجاعى
ما تقسمهاش
ما تقولشى بلاش
و حرام و لا ترسم وش برىء
و تسيب للوقت يقطعنى
باديك بيعنى
و ابقى النخاس
و ارسم تقاطيعك بين الناس
ف ملامح غش
و يا ريت ما تخافش
لو وقع الماسك
و انكشف الوش الجوانى
و اكدب تانى